Spurs hnehin Knicks an champion

New York Knicks chuan nimin zing khan San Antonio Spurs chu 124-113 in an hneh a, kum 52 tehmeuh nomawi an lak loh hnuah NBA Cup an la leh ta - Knicks tan chanchin lawmawm bik a ni ngei ang.

London khawpuia piang OG Anunoby chu Spurs chak theihna hnar a ni, ani hian point 28 neiin an thawhlawk hle. T-Mobile Arena, Las Vegas-a inkhelah hian point 25 neitu Jalen Brunson a ṭangkai hle bawk.

Point Guard Brunson chuan, "Kan thil tum chu hmalam pana kal a ni a, tunah chuan kan ti hlawhtling thei ta. Thil tum tih hlawhtlin theih hi a hlu a, nomawi chawi dan kan hria hi a lawmawm lai chu a ni," a ti.

Brunson hi NBA Cup Most Valuable Player atan thlan niin, amah leh a club tan mellung a ni. Knicks hian kum 1973 khan NBA Final-ah ropuina an chang a, chumi hnuah tun ṭum hi nomawi an chawi lehna hmasa a nih avangin an ngaihlu hle.

Knicks player pasarih ngawtin point 10 an nei tling a, bench aṭanga lut Karl-Anthony Towns (16 point & 11 rebound) leh Mitchell Robertson (15 rebound & 2 block) te an langsang hle bawk a ni.

NBA Cup hi vawi thum an neihna niin, semifinal thleng kha chuan match an chak leh chak lohna te chu regular season atan chhiar vek a ni. Regular season ni mah se, a tawpah final khelh tur a awm avangin inelna a hmuhnawm a, ngaihhlut pawh a hlawh hle.