Vawiinah Jr Boys Football semifinal

ADFA buatsaih Junior Boys Football Tournament 2025-ah team ṭha pali chiah an dam tawh a; MFA Elite FA hnuaia team hnih blue leh red bakah Repubic Veng leh 4 Brothers B ten semifinal an lut. Vawiin chawhma dar 10:00 hian Chite Playground-ah semifinal hmasa zawk khelh a ni ang a, MFA Elite FA (Blue) leh 4 Brothers 'B' te an inkhel ang a, chhun dar 12:00-ah Republic Veng leh MFA Elite FA (Red) te an inkhel ang. Final hi December 19, Zirtawpnia khelh tur a ni.

Quarterfinal

ADFA inlenaah team 14 chauh an tel a, quarterfinal thlengin walkover an la awm. Nimin khan match hmasa bera khel tur Edenthar an kal lo a, MFA Elite FA (Blue) walkover-in an chak. 4 Brothers 'B' leh Sihphir club Grace FA inkhelah goal ruk a lut a, 4 Brothers 4-2 in an chak.

Semifinal-a inhlangkai 4 Brothers-in bul an ṭan ṭha a, Victor Lalhmingmawia leh Hector Zoremsanga te hmanga goal an khung hma bakah Sihphir player Laldinmawia'n an lama a tihluh avangin first half-ah 3-0 a ni tawh. Second half-ah JH Immanuel Lalawmpuia hmangin 4 Brothers-in goal an khung belh a, 4-0 a nih hnuah Grace FA-in goal hnih an khung ve chauh.

Republic Vengin mumal takin RGSA Grassroots Football an kalpui a, a rah a lang chho ṭan. Nimin khan Armed Veng FC chu 9-0 in an sawp. Republic Veng tan Lalvensiama'n hattrick a siam a, Emmanuel Malsawmdawngzela leh Timothy Rinmuanpuia ten goal hnih ve ve an khung bakah James Zosangliana leh Nicholas Malsawmzela ten goal khat ve ve an khung bawk.

MFA Elite FA (Red)-in nimin khan L&R FA, Mualpui 8-0 in an sawp a, tun inelnaah goal 25 an khung ta. MFA Elite FA tan F. Vanlalhriatrenga'n hattrick siamin Arthur Vanlalpeka leh C. Vanlalpekhlua ten goal hnih ve ve an khung a, Lalhriatpuia Sailo-in goal khat a khung.

Semifinal chu

Vawiin hian semifinal khelh a ni dawn a, MFA Elite FA-in team hnih an la thawh. MFA Elite FA Blue-in 4 Brothers 'B' an hmachhawn dawn a, an khelh tawh aṭanga team ṭha zawk thlir thiam a la har hle. Chutihrualin semifinal khel hmasa turte hi inkhel tur hnuhnung zawk ai chuan an nem zawk niin a lang.

Republic Veng leh MFA Elite FA (Red) inkhel tur hi final atan pawha awhawm a ni dawn a, MFA Elite FA buk a rit hret. MFA Elite FA Red hian match hmasa berah Chanmari West 17-0 in an sawp thei a, nimin lamah L&R FA, Mualpui 8-0 in an sawp leh bawk. Republic Veng hi first round-ah an bye avangin match khat chauh an la khel a, Armed Veng lakah chiang taka an chak avangin an ringtawk khawp ang.