Rodgers-a'n Saudi lam a pan

Brendan Rodgers chuan chona thar hmachhawn turin Saudi Pro League a pan - Al-Qadsiah enkawl tura lakluh a ni a, an inremna hi engtiang chena rei nge tarlan ni chiah lo mah se khawtlang chanchinbute chuan kum thum chhung atan niin an ziak.

Rodgers hian tun hmain Liverpool leh Leicester City te pawh a lo enkawl tawh, kumin Ocotber khan Celtic a chhuahsan. Celtic tan hian a kum zawnin league nomawi a chawi tawh a, sulhnu a nei ṭha hle.

Celtic a chhuansan chhan hi sawi a tam, club leh amah erawhin an inṭhen chhan an sawi lo thung. Club neitu zinga chanvo nei lian ber Dermot Desmond nen an thu a inhmu lo nia sawi a ni a, hei vang hian club a chhuahsan nia ngaih a ni.

A club thar tur Al-Qadsiah chief executive James Bisgrove chuan, "Rogers hi kan mi hriatchian a ni a, a theihna sang leh ṭha tak hi hmuh hmaih theih a nei lo, kan club hi Saudi Arabia-ah chauh ni loin Asian club lian leh ṭha ber zinga miah min siam thei ang," a ti.

Rogers hian Spanish manager Michel a thlak dawn a, a hna tharah hian Celtic aṭangin John Kennedy leh Jack Lyons te chuan an zui thung dawn a ni.