Morocco lakah Man United an lungawi lo

Manchester United chu Moroccan Football Association lakah an lungawi lo hle niin BBC chuan an tarlang, an lungawi loh chhan hi Noussair Mazraoui an chhawr theih loh vang a ni.

Morocco hian Africa Cup of Nations (Afcon) an thleng dawn a, inelna hmachhawn tur hian Mazraoui an ko. FIFA chuan club hrang hrang te chu Afcon khel tur player-te chu December 15 a chhuah phalna pe turin a ti.

Afcon hi December 21 aṭanga nakkum January 18 thleng khelh a ni dawn. Man United hian December 15 zan khan Premier League-ah Bournemouth an hmachhawn a, he inkhelah hian Mazraoui an chhawr ve thei lo.

Mazraoui hian kartluanin training a nei a, mahse match pangngai a khel lo a ni. Afcon khel tur player dang Bryan Mbeumo (Cameroon) leh Amad Diallo (Ivory Coast) te erawh chu an club tan an la inlan thei tho si a ni.

Man United chuan Moroccan Football Association hnenah Mazraoui chu match khat atan chhawr phawt an dil a, mahse an dil ang hian an remtihsak lo a, hei hian sawi zui pawh a hlawh phah a ni.

Man United ang tho hian Italian club AS Roma leh La Liga club Real Betis te pawhin Morocco nen buaina an lo nei a, an player chhawr theih tura ngaih chu an chhawr thei bik lo a ni.

Mazraoui an chhawr thei lo a, defender ṭha Harry Maguire leh Matthijs de Ligt te hliam vangin an chawl bawk. Coach Ruben Amorim-a'n tlarhnung laiah kum 19 mi Ayden Heaven leh kum 20 mi Leny Yoro tea din tir a, goal li khung mah se anmahni lamah goal li tho a luh avangin point khatah an lungawi a ni a, pangana dinhmun luah theihna remchang an bawhpelh.