Portugal-ah Formula 1 an tlan leh dawn

Khawvel puma hripui a len lai khan Portugal hian Formula 1 inelna an lo thleng tawh, a hnuah chawl lailawk leh mah se kum 2027 leh 2028 hian car intlansiakna sang ber hi an thleng leh dawn a ni.

Inelna hi Portimao kianga awm Algarve International Circuit-ah tlan a ni dawn, he hmunah hian kum 2020 leh 2021 te khan an lo tlan tawh a; hetih lai hi Covid 19 hluar lai a ni a, a hmunah mipui tam tak an pungkhawm thei lo.

F1 chairman leh chief executive officer ni bawk Stefano Domenicali chuan, "Formula 1 calendar-ah Portugal kan hmu leh thei tur hi ka lawm a, Portuguese mipui car intlansiak ngaina tak tak ten a hmuna inelna an en leh thei tur hi ka lawmpui bawk.

"Tlankawng nuam leh ṭha tak a ni a, kawngkawi hmasa ber aṭanga a tawp thlengin hmun nuam leh chhinchhiah tlak a tling. Inelna hlawhtlin takin kan lo nei tawh ṭhin, tun hma aia ṭha lehzual zawkin kan neih ngei pawh ka beisei," tiin a sawi.

Portuguese GP an tlan hnuhnung pahnihah khan Lewis Hamilton a tlan chak ber, kum 2020 kha chuan Mercedes car a la khelh; hemi season a hnehna a chan hian mellung a phung, F1 huanga vawi 91 chak thei Michael Schumacher-a record a khum chiah bawk a ni.