Mualpho hliah khuhna inkhel dar 2:30-ah Mizoram vs Manipur

79th National Football Championship for Santosh Trophy 2025-26 group D aṭangin Mizoram nge Manipur tlangah tia an thlir ṭhup laiin Nagaland-in final round an lut. AIFF hnuai inelnaah head to head hman a ni a, Nagaland hian Mizoram leh Manipur an hneh avangin pakhatna dinhmun an hauh chiang tawh. Zanin dar 6:30 hian Nagaland hian group match khar nan inelna thlengtu Tripura an hmachhawn dawn a, nuam sa takin an khel thei tawh ang.

Mizoram leh Manipur tan erawh ṭan leh ha ṭhial hun an tawng mek a, Santosh Trophy-a champion tawh team pahnih hi vawiin chawhnu dar 2:30 hian Umakanta Mini Stadium, Agartala-ah an inkhel dawn. Hun hrehawm bik tiziaawm turin chak a pawimawh ang.

Nilaini zan khan Mizoramin Tripura an hmachhawn a, tlai lama Manipur-in 3-0 ngawta Nagaland an hneh loh avangin final round luh beiseina an nei tawh lo. Lalruatliana Sailo hote hian beiseina nei tawh lo mah se defender Lalbiakzuala hmangin minute 10-na lekah goal an khung a, goal dang hmuh tur a awm tawh lo.

Mizoramin goal dang khung tumin nawr chhunzawm mah se awmze neiin an nawr tawk lo a, an goal bawh a na tawk lo. Tripura lakah 1-0 in chauhin an chak a, inchhuahnna tur a awm lo. Manipur-in 3-0 ngawtin Nagaland hneh lo mah se Tripura 5-1 a an hneh avangin table-ah pahnihnaah an awm. Chumi awmzia chu Mizoram tan pahnihna nichunga group stage khar turin vawiinah Manipur an hneh ngei a ṭul dawn a ni.

Tawia hote tan mualpho hliah khuh nana Manipur hneh a ṭul ang bawkin Manipur tan pawh chak a ṭul. Manipur hian bul ṭan ṭha mah se Nagaland lakah an mualpho a, football ngaina state an nih bawk avangin Mizoram ang thoin sawiselna an tawk nasa. Vawiin tlai inkhel hi final round luhna tur chu ni tawh lo mah se inkhel pawimawh a la ni ang.

Covid-19 hrilen hnuah tun ṭum hi Santosh Trophy ṭum li khelhna a ni a, Mizoramin ṭum thum group stage an paltlang lo. Coach Samson Ramengmawia hoin Manipur leh Kerala-ah group stage an patlang thei lo a, hun harsa karah coach Lalsangzuala Hmarin 2023-24 season khan final round a luhpui bakah semifinal hial a thlenpui. Sanga hian Mizoram pathumna a nihpui hnuah Mizoram team a enkawl leh tawh lo.

Kumin Santosh Trophy-ah hian team 38 an tel a, team 35-in group stage an hmachhawn. Final round thlengtu tur Assam bakah nikum finalist West Bengal leh Kerala ten final round an lut nghal. Team dang 35 hi group pakuaah ṭhen niin group khat aṭanga sang ber ṭheuhin final round an lut ang.