Silly Point: Masi present - Champion

"Mahni ngaihdan dah ṭha thiam a, midang thusawi leh an thlir dan thlang uluk taka ngaihthlaksak theihna hi Hruaitu Ropui ni tura pawimawh hmasa ber a ni." - Sujith Somasunder (Head of Education, National Cricket Academy)

Ashes series hmuhnawm tak leh South Africa-in Hamara Desh an rawn thlawh programme hnuhnung lam a ni ṭan e. Tun ṭumah erawh thailanna hmun a chang lo.

Champion kalkawng

Cricket Association of Mizoram (CAM) lam duhsakna avangin inkhelh ka chawlhsan kum li hnuah, a professional team ber (senior mens) enkawl tur zingah min han duhsak hlauh mai a. Ka kawppui leh min hrual puitling tur atan India cricket-ah chuan mi hrang, kum 25 coaching lo vahvaihpui tawh Ramaligam Srikanth ( Coimbatore) chu head coach-ah a awm.

Ajay Jadeja aṭanga Virat Kohli te lo enkawl tawh ṭhintu, US National team thlenga lo enkawl tawh Delhi mi Parmeet Singh leh kum tamtak age level-a Mizoram team lo ti fit tawh-tu Baroda tlangval Shabaz Mansuri bakah khelmual pawn leh thil ṭul dang zawng zawng vaihma thei manager ṭha mi Ṭhuampui pavalai Kros Lalnunpuia te ho nen kan han inkawp ve ta chu a ni.

Kum lama naupang te, thuawih leh nitin pen khat tala hmasawn tum mi Ramhlun Venglai tlangval Joseph Lalthankhuma a lo ni leh zel hian engkim mai hi khuanu hian a rawn rem dik emaw tih mai tur a ni.

Chemistry

Pawl, team, group etc enkawl tur, hruaitu ni tur hian - mi fing ber, certificate nei ṭha ber ber, thiam ber ber remkhawm ruih hi a chhanna a ni lo a, inlungrual, hrui khat vuan, thawk ho thiam leh inman te hi an lo pawimawh ber a. Hemi kawngah hian CAM lam hotute fak an phu.

Champion zinkawng

India Cricket a trophy hlu ber leh State Association min tehna chu Ranji Trophy a ni a, chu chu kumina he coaching staff leh captain ṭhutkhawm hmasak ber pawhin kan 'goal' a ni.

Disadvantage kan nei nghal a - chu chu mahni ramah ngeiah 'home match' kan la thlen ve theih miau loh avangin ram hla takah a thla tel, mi ram stadium hawh chungin, hotel chu kan inlum ang maia ngaiin kan inkulh a ngai bik a.

Meghalaya nen khaw ṭha vek si, ni li tal tawp kan inkhel theih loh te, in draw reng si a, Sikkim-in 1st innings min lehpel leh Manipur laka kan irhfiak te, round hnuhnung bera chak zawk zawk final lut inkhela Bihar laka inkhel mak dangdai tak kan han chhawp chhuak thei te kha. Khuarei thlengin kan theihnghilh lo ang.

Chutihrualin Ranji Trophy-ah erawh kan tum ram kan thleng thei lo a, kan tan kum ṭha a la inher chhuak ngei ka beisei. Kan la champion dawn alawm ti fat fat chungin kan hliam te thawi damin Pune Khawpui kan pan.

Syed Mustaq Ali Trophy

Ball sen hmanga inkhelhna, Ranji theihngilhin India Domestic a ngaihhlut ber dawttu leh IPL khelh tum tana rahbi pawimawh ber T20 tournament lamah rilru sawrbing nghal a ngai a.

Hringnun zin kawng pangngai ang bawkin harsatna leh buaina ten min kiansan bik lo. BCCI danah professional (outstation) player hi pathum lak theih a ni a, state dang ang bawkin Mizoram player-te hrual leh kaihruai turin mi pathum kan lak zingah, IPL star CA Cariappa hi Ranji Trophy inkhelh chanveah khian a kutzung tihtliah avangin min peih loh san a.

T20 kan ṭan dawn chiah tiin, kan run siam khawl India Under 19 star hlui Mumbai tlangval Arman Jaffer a chu practice-na lamah khup a inhliam, a season chu a tawp a ni zui ta der.

Harsatna & chona

Kumin Season kan ṭan dawna player-te zawng zawng te nen kan inhmuhkhawm hmasak bera coaching staff lamin kan thupui ber chu, "Kan outstation player te hi an tih tur an rawn ti dawn. An chhehvela in lo vir kual ve tur a ni lo a, Mizo tualchhung player-te hi kan ring tawk che u a, player rinrawl in ni dawn a, heng professional kan lak te hi in vela zawk an rawn vir kual tur a ni," tih hi a ni.

Kan infuihna hian nasa takin kan player-ah te mawhphurna lak ngamna leh inrintawkna a pe ni ten kan hre ve. Player-te harsatna pawh chonaah an ngai hial a ni.

Champeone

Kan lo thang bo rei ta deuh nen, inhliam, rilru leh thlarau lam chau ve tawh, taksa lamah pawh na neuh neuh nei chungin player-ten ṭan an han khawh leh a. Kan hmachhawn apiangte kan ngam chho ta zel.

Batting leh bowling chu dah ṭha ila, T20-a nghat phei chuan kan fielding-in hmasawn a ngai tih kan hria, chauh leh nin an sawi ngai lo, darkar khat dawn dawn fielding session kan han neihpui pawn, phur tak leh champion tumna rilru nen tupawh khan an hmachhawn a ni.

Chumi rah chu anmahni ngeiin an seng a, final luh nana league match inkhel hnuhnung ber Meghalaya leh League lama kan hneh loh awmchhun Sikkim nen ngei final-a kan intum leh meuh kha chuan kan naute fielding kha IPL standard hi a ni ber tawhin ka hria.

Ball man tur awm thei zawng zawng hlah miah lo in an dawng fai vek, run hnih chhuak turah run khat lek te an pe a, boundary tur engzah tak nge an ven bawk ni. An coach ber pawn ka taksa na ṭhuma ka training puina hi ka theihngilh leh vek tawh.

Kawng chanve pawh kan la zawh lo

Tunah hian professional bika ngaihhlut lo deuh bera ngaih over 50 inkhel Ranchi lamah Masi hmang tura pan leh mai tur kan ni a. Kan tum ram Ranji tlang chhip la thleng lo mah ila, chunglam malsawmna avangin T20 champion nomawi chu a ṭum khatna atan Mizoram ta a ni ve ta. Kum a lo thar anga, season a lo thar leh anga he team hian bul a ṭan chauh a ni.

Han chapo pui hluai leh hahipa han fak chiamna tur an la awm lo a, players naupang rual, mahni career la insiam chho mek an ni deuh fur. Mahse tun anga an kal zela, tun ang rilru dik pua Mizoram meichher hi tinun zel an tum a nih chuan Joseph Lalthankhuma, Jehu Anderson, K. Vanrotlinga, Sahil Sharma, Lalnunfela, Lalrempuia leh TC Lalremruata etc etc (ka ziak vek seng lo) tih hming hi hmanni lawka Under 19 Hmeichhe ho chungchang kan thailan ṭuma kan sawi tawh ang khan, Household hming hi an ni thuai dawn.

Chu thil thleng tur erawh chuan ram tiam lam panin kal zelna tur hmabak thui tak a la awm. Kawng chanve pawh an la zawh zo lo e.