Aizawl FC leh Gokulam inhnehtawk

Inrinni zan I League inkhelah Aizawl FC leh Gokulam Kerala te 1-1 in an inhnehtawk.

EMS Stadium-ah Mizo club-in Abdoulaye Kanoute hmangin goal hmahruai khung mah se defender Joseph Adjei hnawhchhuah a ni a, player 10-a an khelh hnuah Kerala club hian Marcus Joseph hmangin si phurh an sut.

I League inkhel dangah Churchill Brothers-in minute 90-naa Willis Deon Plaza hmangin East Bengal 1-0 in an hneh a, Goan club hian point kua hmuin pahnihna an ni. Churchill hian January 8, Nilaini hian RG Stadium, Mualpuiah Aizawl FC an hmachhawn ang.

Aizawl FC coach Standly Rosario-a'n rinlawk angin Mizo player a lak tharte bul a ṭantir lo a, chutih rualin tlarhnung erawh a siksawi hret. Mizo club-in Punjab FC an inhnehtawkpui ṭumin Lalramhmunmawia (Tea) a khel ṭha tawk lo a, 

C. Lalrosanga chu tlarhnung mual vei lamah dah a ni.

Kozhikode-a entu 13,351 hmaah Aizawl FC-in bul an ṭan fuh zawk a, Paul Ramfangzauva ball siam chu Kanoute-a'n mawi zetin minute 14-naah  a khung. Amaherawhchu Mizo club vanduaina a kaltluang a, Ghanaian defender Joseph Adjei chuan box chhunga a handball vangin penalty a chawi a, hnawhchhuah a ni bawk. Aizawl FC hian match hnuhnung pathumah penalty an chawi vek.

Gokulam forward Marcus Joseph-a'n AFC keeper Lalremruata venah penalty a khung thei lo a, Mizo club-in 1-0 in hma an hruai chhunzawm. Standly-a'n fimkhur a ṭul tih hriain Rochharzela la chhuakin left back Tea dah lutin Rosanga chu MPL-a an khelh dan angin Richard Kassaga nen defence laiah a inkawptir.

Gokulam Kerala-in goal khung tumin first half-ah Lalromawia an rawn luhtir a, second half-ah striker Salman Kalliyath leh midfielder Haroon Amiri te an rawn luhtir leh bawk.

Player tam zawk Kerala inkhel a nung chho a, minute 70-naah penalty hlahtu Marcus Joseph-a'n a tihsual thup nan si phurh a sut.

Aizawl FC-in bench aṭangin an player thar MC Malsawmzuala leh Ramhlunchhunga te luhtir mah se hming chher turin hun an nei tam lo a, player 10-a an khelh tawh avangin an hna a harsat phah bawk. Mizo club-in khualmualah point khat hlu tak an hlawh chhuak.

Inkhelh banah Standly Rosario chuan, "A handball miau chuan penalty tur chu a ni a, red card tur erawh a ni lo. Penalty a pek chuan yellow card a pe tur a ni a, amaherawhchu direct red card a pek  avangin Joseph hi match hnih kan chhawr thei dawn lo. I League-ah referee an ṭha tawk lo a, kan club pawhin kan tuar ngun ta hle. Chutih rualin ka naute inpeknaah ka lawm takzet," tiin Vanglaini a hrilh.

I League club zinga Aizawla zin leh hmasa ber tur chu Churchill Brothers an ni a, Goan club hian East Bengal an hneh theih avangin inkhel entu pawh an tam phah sawt ang. Kolkata club lama goal awm chhun khungtu Willis Plaza hi East Bengal tan pawha khel tawh ṭhin a ni a, amah duh lotu lakah phuba a la.

Goan club-ah hian Kelkang tlangval Lalkhawpuimawia'n (Mapuia) bul a ṭan ṭhin a, East Bengal nen hian Vanlalduatsanga chu bench aṭanga lutin Lalengzama Vangchhia erawh squad-ah awm mah se a inlan lo. Mizo club an hmachhawn hunah Mizo pathum Mapuia, Duata leh Engzama te an rawn zin ngei beisei a ni.