Alcaraz leh a coach Ferrero an inṭhen

Carlos Alcaraz leh a coach Juan Carlos Ferrero te chuan kum saih hnuah an thawhdunna an titawp, Spanish star leh amah chher hriamtute inṭhen thu hian tennis khawvel a barakhaih chiang hle.

Kum 22 mi Alcaraz leh Ferrero te hi an thawhdunna a rei tawh, rawlthar a nih lai aṭanga amah enkawla tuai hriamtu a ni. Hma hun thui tak an la nei dun tur anga a lan laiin, kum 2026 season ṭan hmain an thawh dunna an titawp ta zawk.

World number 1 Alcaraz emaw Ferrero emaw zawk pawhin an inṭhen chhan hi chiang takin an sawi lang lo. Alcaraz chuan, "Ka naupang lai aṭanga ka duhthusam leh suangtuahna min tih puitlin saktu a ni a, a chungah ka lawm hle.

"Naupang mawl mai ka nih lai aṭangin tennis zingkawng min zawhpui a, zinkawng nuam leh hlimawm tak min zawh pui. Kan hun tawn hrang hrangte kha ka ngaihlu a, ka theihnghilh ngai tawh lo ang," tiin a sawi.

Alzaraz hian Grand Slam nomawi paruk ngawt a la tawh - French Open, Wimbledon leh US Open title a la vek tawh, a hmabak awmchhun chu Australian Open chauh a ni tawh, nakkum January hian an khel ang.

Nakkum May 5-ah Alcaraz hian kum 23 a tling dawn chauh - Australian Open 2026 champion a nih ngat chuan Grand Slam palia champion kim thei naupang ber a ni ang, sulhnu hlu leh ṭha bik hnutchhiah turin hun remchang a nei dawn.

Alcaraz hian coach atan tunge a hman zui dawn a la sawi lo. Khawthlang chanchinbu rintlak deuh te chuan, tuna a coaching team zinga mi Samuel Lopez chu coach pangngai ni chho turah an ngai, ani hi Ferrero remchan loh lai pawha a hmunruak luah tawh ṭhintu a ni.