Suarez-a'n contract thar a ziak

Luis Suarez chuan Inter Miami tan season khat daih contract a ziak thar a, kum 2026 season zawh thleng chu Major League Soccer club tan hian a la khel chhunzawm leh zel dawn tihna a ni.

Season hman zawh takah khan Suarez hian Inter Miami tan inelna hrang hrangah match 50 a khel a, goal 17 khungin a ṭhiante goal khung tur vawi 17 bawk a siamsak. Thla thar hian kum 39 a ni mai tawh dawn, khelmual chhungah erawh a la rinthlak hle.

Uruguay international hlui Suarez hian 2024 season an ṭan dawn khan Inter Miami hi a zawn, tun hma lama Barcelona tana a khelhpui tawh Lionel Messi, Sergio Busquets leh Jordi Alba te nen an khel ho a ni.

Inter Miami tana a season hmasa berah Suarez hian Supporters' Shield title a lak pui a, kumin Aigust khan League Cup final an khelh ṭumin Seattle Sounders staff zinga mi chu chil a chhak khum avangin match kua ngawt an lo hrem bawk.

Tun hmain a nungchang ṭhat tawk loh vangin hremna a lo tawk tawh bawk a, a inkhelh thiamna erawh thup theih a ni chuang lo. Tun season an hman zawh takah khan Miami hi a vawi khat nan MLS Cup a lakpui a, hriatreng a ni tawh ang.

Inter Miami hian squad an thuam chhah zel - hmanni deuh khan club neitu zinga mi David Beckham chuan Tottenham Hotspur leh Real Madrid tana khel tawh defender Sergio Reguilon chu inremna a lo ziah pui tawh bawk a ni.