Copa del Rey: Real an chak ve leh ta

Real Madrid chuan Copa del Rey round of 32-ah hnehna an chang a, an mikhualna ramah Talavera chu 3-2 in an hneh - Kylian Mbappe chuan goal hnih a khung a, Barcelona leh Atletico Madrid te nen round of 16 an lut.

Talavera hian goal thum khung zawk mah se, goal khat hi an centre back Manu Farrando-a'n an lama a tihluh a nih avangin an chhawr lo a, Nahuel Arroyo leh Gonzalo di Renzo ten goal khung ve bawk mah se, 3-2 in an tlawm.

Real Madrid-in match hnih a zawna an tlawm hnuah, match hnih a zawnin hnehna an chang ve leh ta a, ban theih dinhmuna ding Xabi Alonso-a'n club thuneitute rilru erawh a hmin viau a la rinawm chuang lo!

Madrid khaw club hian an league match hnuhnung berah Alaves hneh mah se, goal khat an chhuah a, Talavera lakah pawh chak mah se, goal hnih an chhuah tho - an hneh tak hi Spanish fourth division team an ni.

Insiksawi

Real hian Inrinni zan dar 1:30-ah league match khel turin Sevilla an mikhual lehnghal dawn a, Alonso-a'n hei hi hre ranin, Alaves hnehtu team aṭangin player 10 ngawt a siksawi.

Madrid khaw club tan first choice keeper Thibaut Courtois chu squad-ah pawh a awm lo a, Jude Bellingham, Vinicius Jr leh Rodrygo te pawh bench lamah awmin, Endrick chuan tun season-a a vawi khat nan bul a ṭan.

Mahse, Real tana bul ṭan zingah Kylian Mbappe a awm vung a, Dean Huijsen leh Fran Garcia te ho an la awm bawk avangin fourth division team laka chungnung turin Real hi an la ṭha tawk.

Real hian inkhel ṭantir aṭangin game an thunun nghal a, mahse, goal erawh an khung thei lawk lo - penalty an mamawh. Talavera player Marcos Moreno chu penalty box chhungah a handball a, hei hi Mbappe chuan remchangah lain, minute 42-naah hmahruaina goal a khung.

A awlsam lo

Madrid-in 1-0 in hma an hruai a, first half hun pek belhah pawh an vannei zui. Mbappe ball pet chu Farrando chuan an lamah tilutin, 2-0 in chawlhlawk hman a ni a, chak tur a chiang.

Mahse, mikhual team Talavera hian star rual kawltu Real an hlau lo. Minute 80-naah Nahuel Arroyo chuan mualneitu team tan si phurh a sut ṭhen a, 2-1 a ni.

Talavera beiseina erawh chhum rei lotê langa ral leh ang chauh a ni a, goal an khung aṭanga minute riatnaah Mbappe bawk inlarin, an goal thumna a khung a, 3-1 a ni der.

Spanish fourth division club-in hun pek belhah Di Renzo hmangin an khung ve leh hram a, mahse, hun a tlai tawh - Real hi 3-2 in an chak a, Madrid khaw club tan inenfiahna tur darthlalang an chhawpsak thung.

A hming Mbappe

Mbappe-a'n goal hnih a khung a, kum 2025 chhunga Real tana goal 58 a khungna a ni - Real tana kum khat chhunga goal khung hnem ber Cristiano Rondaldo-a'n kum 2013-a a khung zat goal 59 khung turin goal khat chauh a mamawh ta.

Mahse, Mbappe tan kum khat chhunga club tana goal khung hnem ber Lionel Messi record erawh a khum dawn lo chiang - Messi hian kum 2012 khan club tan goal 79 ngawt a khung a, ram tana a khung zat nen phei chuan goal 91 a tling!

Messi ropui luat avangin Mbappe goal khung zat erawh sawi nep theih a ni lo. Kum 26 mi striker hian tun season bikah goal 28 a khung tling der tawh a, match 23 chauh a la khel.

Inrinni zana Sevilla an mikhual hunah a khung belh ang em? tih chu zawhna a ni mek - hei chauh hi he inkhel tinghahhlelhawmtu a ni lo a, Alonso-a'n a zawnin a naute chakpui mah se, match hnihah goal thum an chhuah a, a hna a la him lo.