Thiago Silva leh Fluminense inṭhen

Brazilian defender Thiago Silva chuan a khelh mekna club Fluminense nen inhriatthiam tawnnain a contract an titawp.

Defender tawnhriat ngah Silva hian Europe a kir leh a rilruk nia sawi a awm a, nakkum maia khelh tur World Cup-ah an ram Brazil tan inlan a la tum hle.

Kum 41 mi Silva hian thla ruk contract a la neih chu hmang zo loin tihtawp a rilruk ta zawk, Brazilian club hi kumin May khan a zawm a ni. Fluminense pawhin thuchhuah siam ve nghalin, "Thiago Silva hian he club-ah hian sulhnu zui tur ṭha tak a hnutchhiah a ni," tiin PSG leh Chelsea tan pawha lo khel tawh defender an thlah.

Silva hian Fluminense chu kumin July-a khelh zawh tak Club World Cup-ah khan semifinal a thlen pui a, Fluminense tana a khelh leh vawi hnihnaah hian game 47 khel hmanin goal thum a khung a, first team tan regular taka inlanin a la thawhhlawk hle.

Hetihlai hian Thawhlehni khan Chelsea defender hlui John Terry chuan, Thiago Silva chu Champions League title a lo lakpui tawh Chelsea-ah kir leh se a duh thu TikTok lamah a lo sawi ve bawk. Terry chuan, "Silva fate pahnih hi kan academy-ah an awm mek a. Thlasik chawlh hmang tur pawh hian London lamah a lo kal ngei dawn," a ti bawk.