Spurs hmachhawn tur Szoboszlai

Brighton & Hove Albion laka 2-0 a an chak ṭuma inhliam, Liverpool midfielder Dominik Szoboszlai chu Inrinni zan dar 11:00-a Tottenham Hotspur an hmachhawn hunah inlan thei tura beisei a ni.

Tun season-a Liverpool player ṭha ber anga chhal ngam Szoboszlai hi minute 83-naah hliam vangin lakchhuah a ni a, a hliam neihna hi a kerekah niin, a tirah chuan a hliam vang hian rei tak a chawlh an ring.

Mahse, Hungarian midfielder hi uluk taka enkawl a nih hnuah beisei aiin a dam chak nia sawi a ni a, Liverpool hian Spurs a hmachhawn dawn leh dawn loh chungchangah, vawiinah thutlukna an siam ang.

Kum 25 mi Szoboszlai hian tun season inelna hrang hrangah Liverpool tan match 23 khelin goal nga a khung tawh a, assist vawi nga a nei bawk - heti chung hian right back-a khelh a nei nual!

Hetihlai hian Brighton laka hliam vanga lakchhuah ngai tho, inhliam ngun ve tak Joe Gomez pawh a hliam a serious lo nia sawi a ni a, Arne Slot-a'n a duh chuan a chhawr leh thei tawh ang.

October 22-a a inhliam hnua Liverpool tana la inlan leh lo, Dutch right back Jeremie Frimpong pawh Spurs hmachhawn turin a dam tawh a, match khat hrem vanga Brighton hmachhawn thei lo Conor Bradley chuan hremna a tuar zo tawh bawk.