Villa vs United : Goal a beisei theih

Manchester United-in December 21, Pathianni zan dar 10:00 hian Aston Villa an tlawh dawn a, tun hnaia club pahnih khelh dan thlirin goal luh tamna turah a ngaih theih. Ruben Amorim-a hoten match hnuhnung pakuaah goal an chhuah vek a, match hnuhnung berah phei chuan Bournemouth lakah goal li khung mah se goal li lai an chhuah.

Unai Emery kaihhruai Aston Villa hi table-ah pathumnaah awm mah se an tlarhnung a phui bik lo a, match hnuhnung paliah goal sarih an chhuah. Chutihrualin Villa hian table chung bera awm Arsenal an hneh thei tih hriat a ṭha.

Villa midfielder Morgan Rogers-a'n a theihna sang tak a lanchhuah tir zel a, Villa player pawimawh ni ringawt loin World Cup-a England innghahna tur hiala ngaih a ni. Rogers hian tun season Premier League-ah goal nga a khung tawh a, assist vawi thum nei tawh bawkin, Man United tlarhnung tan ven uluk a ṭul ang.

Man United lam hi an kim thei dawn lo a, hrem vangin Casemiro a khelh theih dawn loh bakah AFCON vangin Bryan Mbeumo, Noussair Mazraoui leh Amad Diallo te an khel thei dawn lo. Goal khung lamah Bruno Fernandes leh Matheus Cunha te chungah an innghat nasa dawn a, goal venhim kawngah kum naupang zawk Leny Yoro leh Ayden Heaven bakah goalkeeper Senne Lammens te chungah an innghah a ṭul ang.

Ruben Amorim pawhin a chhawr ṭhin player-te a hman theih dawn loh avangin loh theih loin a chhawr ṭhat duh loh Kobbie Mainoo a hman ṭul tawh dawn. Mainoo hian World Cup khelh a duh avangin club dang zawm a duh hial a, Man United lamin an phalsak lo. United States-a zin a tum a nih chuan Casemiro hrem leh Mbeumo te awm loh lai hi remchangah a hman thiam a ṭul dawn a ni.