Krismas boruak a nuam kan ti tur a ni–Arteta

Arsenal manager Mikel Arteta chuan krismas vuakveta match khelh tur tam chu hautak mah se, nuamti taka Premier League an khelh tur thu a sawi a, midang tan ennawm chhawpchhuah ngei a tum.

Arteta chuan, "Match khelh tur a tam hi chu boruak a danglam ṭhin, kan hnathawhna leh mimal nunah hian thil tam tak a lo thleng ṭhin a, puitling taka kan hmachhawn a ngaih chang a awm ṭhin.

"Hun puiah match a awm leh dawn, mi tam zawkin chawlh an neih laiin keini chu kan chawl dawn lo. Mi chawlh lai a nih avangin inkhel entu an tam ang a, boruak a danglam leh hle ang.

"Thlasik boruak vawt tak karah pawh midang chawlh hmangte tana hmuh nuam takin chet kan tum tur a ni," a ti. Arsenal manager ropui Arsene Wenger pawh khan football chu midang tana a krismas thilpek a nih thu a lo sawi tawh ṭhin.

Arsenal hi Premier League hmahruaitu an ni mek, an hmahruaina erawh a nghet tawh bik lo, pahnihna Manchester City nen an inkarah point hnih chiah a awm tawh a, match khat chetsual lekah an hmahruaina an hloh thei.

North London club hian zanin dar 1:30-ah Everton an tlawh dawn. Arteta hi player a nih laiin Everton tana lo khel reng tawh a ni a, tunah erawh khelmual thar Hill Dickinson Stadium an hmang tawh, khelmual tharah chuan a luh vawi khatna tur a ni ang.

Arteta chuan, "Goodison Park-ah khan sulhnu tam tak ka nei a, hun nuam tak ka lo hman tawh ṭhinna hmun pawh a ni. Coach ka nih hnuah pawh ka lut fo a, inkhelh harsatna hmun a ni tih pawh ka hria.

"Tuna stadium thar pawh hi inkhelh a awlsam lo ang, hnehna chang tur chuan a ṭha thei ang bera kan khelh a ngai dawn a ni," a ti a, tlarhnung lama an buaina erawh chinfel mai theih a la ni dawn lo.

Gabriel chu hliam vangin a la chawl a, a lo kir hun tur a la chiang lo–Ben White a hliam ve leh bawk. William Saliba chu innghahna a ni dawn a, France international kianga ding tur ber rinthiam harsa khawpin hliam an ngah.

Season an hman dan chhut erawh chuan Gunners hi chungnung zawk tura ngaih an ni a, point thum hlawh chhuak tur erawh chuan David Moyes naute lakah match awlsam beisei chi a ni lo ang.