Xhaka hian danglamna a thlen - Ballard

Sunderland defender Dan Ballard chuan an midfielder Granit Xhaka a dahsang thiam hle a, nipui bazar laia an lakluh Xhaka chuan danglamna nasa tak thlenin Premier League table chung lamah an awm theih chhan niin a sawi.

Championship playoff aṭangin Sunderland hian EPL an khel a, kai thar ni mah se team hmuhnawm zinga mi an ni phak - League match riat an khelh tawh chinah point 26 an hmu, pariatna niin champion lai Liverpool leh Manchester United te nen an point a inzat.

Nipui bazar lai khan Sunderland hian player an la lut nual a, an zingah hian kum 33 mi Xhaka chu telin Bayer Leverkusen aṭangin an la lut a, khelmual chhung leh a pawnah a ṭangkai, hruaitu a ni tel nghal bawk.

Ballard chuan, "Kan lakluh kha chuan min barakhaih angreng, a chhan chu amah ka lo hriatchian tawk loh vang a ni. Player pakhat maiin hetiang tak hian team tan danglamna a thlen thei ang tih hi ka ring phak ngai bik lo.

"A thil tih hrang hrang hi ka lo chhinchhiah ṭhin a, kei chuan a tih tur chin chu dik leh ṭha takin a ti vek niah ka ngai. Training kan neih lai te, kan ṭhut khawm leh thil dang kan honaah hian hruaitu a ni thei nghal zel," a ti.

Sunderland an chet ṭhat theih nan Ballard pawh hi player pawimawh zinga mi niin, tun season league match 14 a khel tawh. Zanin dar 8:30 hian Brighton & Hove Albion an lenchilh leh ang.