Chelsea tum tur Newcastle United, Blues-ah Maresca a hlim

London club lian Chelsea chuan zanin dar 6:00 hian Newcastle United an tlawh dawn. Table-ah team pahnih hi an awmna inhlat viau mah se an inthlauhna chu point ruk chauh a nih avangin St. James Park-a inkhel hi a hmunawm a rinawm.

Blues tan hian tlarhma lamah inhliam vangin striker Liam Delap (dar) leh Brazilian winger Estevao (tihrawl) te chu inlan lo tur an ni a, midfielder Romeo Lavia leh defender Levi Colwill te chu an inlan a rinawm lo bawk.

Amaherawhchu, Chelsea hi an squad a chhah ṭhat avangin mangang tur erawh an ni lo. An thiampuipa Cole Palmer a dam tawh a, Argentine winger Alejandro Garnacho form lai tak a ni bawk nen, phur takin Magpies an tlawh a rinawm.

Hetih lai hian Newcastle defender te hliamin a tlakbuak a, Kieran Trippier, Sven Botman, Emil Krafth, Dan Burn, Tino Livramento-te chu an khelh a la rinawm loh zel a, Lewis Hall dinhmun a chiang lo bawk.

Chutihrualin, Swiss defender Fabian Schar leh German defender Malick Thiaw an awm bakah, inhliam zinga a tam zawk hi full back ni mah se Fulham lakah rawlthar Lewis Miley chuan a rintlakzia rawn pholangin chakna goal a khung a, zaninah pawh chet ṭhat chhunzawm zel a duh ang.

Midfield erawh an dam kim thawkhat a, Brazilian duo Bruno Guimaraes leh Joelinton bakah Italian midfielder Sandro Tonali te an din ho a rinawm.

Tlarhma lamah German striker Nick Woltemade a awm leh dawn a, Alexander Isak thlak tura an lak Woltemade hi ven uluk bik a ngaih leh dawn bakah amah thlawptu tur English winger pahnih Anthony Elanga leh Anthony Gordon te hi danglamna thlen thei tur khawpa theihna nei sang an ni.

Hetih lai hian Chelsea boss Enzo Maresca chu Pep Guardiola thlaktu tur anga sawi a awm mek a, Maresca erawh chuan thu lawilo mai mai a nih thu a sawi thung.

Italian coach Maresca chuan a pu hlui Guardiola thlaktu tur a ni dawn em, tih zawhna chu chhangin, "He hmunah hian 2029 thleng contract ka neih bakah ka hlim em em a, Chelsea chiah ka rilruah awm avangin thu lawilo mai mai ka intihbuaitir hman lo," a ti thung.