Milan pet chhuaktu Napoli

Rasmus Hojlund chuan striker rintlak a nihzia chu a takin a lantir leh ta - Ningani zan Italian Super Cup inkhelah Napoli chuan champion lai AC Milan 2-0 in an hneh a, final an lut.

Manchester United aṭanga loan hmanga an hawh Rasmus Hojlund hian first half-ah David Neres-a khung tur a siamsak phawt. King Saudi University Stadium-a inkhelah Hojlund a hmuhnawm chhunzawm, an goal hnihna pawh a khung.

Denmark inter-national Hojlund hi defender Koni De Winter chuan veng uluk hle mah se, angle zim angreng tak aṭangin goalkeeper Mike Maignan-a dan theih loh turin a khung a, an chak a nemnghet.

Napoli hian final-ah chuan Inter Milan leh Bologna te inkhela chak zawk an hmachhawn leh dawn, nizan khan semifinal hnuhnung zawk hi khelh niin result kan hre hman lo - kar lehah a hmawr bawkna neih zui nghal tur a ni ang.

Napoli captain Giovanni di Lorenzo chuan, "Kum 2014 hnuah kan la champion leh lo, kuminah nomawi chawi ngei tumin theihtawp kan chhuah a, a hmawr bawk dan ṭha neih ngei kan tum ang," a ti.

Naples club manager Antonio Conte chuan, "Hliam leh harsatna nei loa match khelh tam chu a tihdan a la awm, player pawimawh inhliam nual chunga ni thum dan lek leka match khelh tur a awm chuan lu a hai," tiin a sawi a, chak mah se season an hman mek chu hautak a ti hle.

Italian Super Cup hi Serie A leh Coppa Italia a champion leh pahnihnaten an khelh a ni a, ruahman dan chuan kum 2029 thleng hi Saudi Arabia-ah an khel chhunzawm ang.

Chak lo Milan coach Massimiliano Allegri chuan, "Goal kan chhuah holam ṭhin deuh a, a tawpah kan tuar. Goal khung ang thoin a venhim hi a pawimawh a ni tih kan hriat a ngai," tiin a sawi a, an chak loh chhan chu an tlarhnung phui loh vangah a puh.

Milan hian Serie A lam an ngaihtuah chhunzawm a ngai dawn; Italian football inelna sang berah hian pahnihna ni mekin an chunga awm Inter Milan an um dawn a ni.