Juventus mualah Roma an lut dawn

Zanin dar 1:15 hian Juventus chuan Serie A match khel turin AS Roma an mikhual dawn a, tun hnaiah team pahnihte hi team nghet leh ṭha zawk indin tuma bei mek an ni a, inkhel a hmuhnawm ang.

Old Lady hian khualmualah Bologna an hneh avangin inrintawkna an nei sang dawn, zaninah an khingpui tur hi Italian team ṭha ni mah se Serie A bikah chuan vawi 42 an hneh tawh - Roma hneh thei tam ber chu Juventus hi an ni.

Luciano Spalletti enkawlna hnuaiah Juventus an indinthar mek a, tunlaia an player hmuhnawm Kenan Yildiz chu Roma tlarhnung tana ven uluk ngai tur chi a ni ang - Turkey international hian season kal laiah goal ruk a khung a, a ṭhiante khung tur vawi sarih a siamsak tawh bawk.

Bologna an hneh ṭum pawh khan Kenan Yildiz hian Juan Cabal-a khung tur a siamsak a, kum 20 mi chauh la ni mah se khelmual chhungah a puitling tawh avangin an tumpui tan a hnawksak thei hle.

Juve manager Spalletti chuan, "Team ṭha tak chu kan ni tawh a, nghet taka ding tur erawhin hmasawnna tur tam tak kan la nei. Roma hi kan tan fiahna ṭha tak a ni dawn, kan ṭhatna leh ṭhat tawk lohna lai chiang takin a lang ang," tiin a sawi.

Turin club hian Serie A match 15 an khelh aṭangin point 26 an hmu a, pangana an ni mek - an chunga awm chu Roma hi niin, Spalletti naute hian point li laiin an la phak lo.

Rome leh Juve te hi season thara Champions League khelh phak tum an ni a, anmahni pahnih intawnna hi a pawimawh. A bik takin Juventus hi an chak lo a nih chuan an tan UCL ticket beiseina a tlahniam thei dawn a ni.