A chung bera Krismas hmang tur Arsenal
Arsenal chuan Premier League hmahruaitu ni chungin kumin Krismas chu an hmang thei dawn tih a chiang ta. Gunners ho chuan a chung bera awm chungin 'Masi Ruai' an ṭheh dawn a, an hlimna a sang fal bik a nih pawhin an demawm loh ang.
Inrinni zan khan Arsenal hian an mikhualna ramah Everton chu 1-0 in an hneh, goal awmchhun hi striker Viktor Gyokores-a'n penalty aṭanga a khung a ni a, anmahni goal venghim tluan zuiin point thum hlu tak an hlawh chhuak.
Premier League match 17 an khelh aṭangin Arsenal hian point 39 an hmu a, anmahni hnaih bertu Manchester City aiin point hnihin an sang zawk - a chung bera awm ni mah se an hmahruaina erawh a la nghet lo, inthlahdah a remchang lo tihna a ni.
Penalty a tawk
Hill Dickinson Stadium hi Everton khelmual thar a ni a, coach Mikel Arteta tan hmun thar a ni - Arsenal manager Arteta hi Everton tana lo khel tawh ṭhin a ni a, a club hlui hmachhawn hi atan thil nuam tak a ni kher lo mai thei, hnehna chan erawh a duh tih a chiang.
Minute 27-naah Declan Rice-a'n carner aṭanga ball a pet chu Jake O'Brien chuan a kutin a lo khawih fuh - VAR hmanga endik a nih hnuah penalty pek niin, a pet tura rawng dik chhuak Gyokores-a'n a hlah lo chiang lo.
Mikhual Gunners lamin inkhel thunun zui mah se goal dang erawh an khung belh thei bik lo. Second half-ah Leandro Trossard leh Martin Zubimendi te chuan woodwork an tihper a, goal dang lut lo mah se penalty vawi khat an khung chu chak nan a tawk.
Krismas boruak
Premier League season chanve an hmang tling dawn a, tun hma pawhin Krismas laia hmahruiatu zawng zawng an champion kher lo. Tun hnai season 33 chhet chuan Krismas laia hmahruaitu hi vawi 17 an champion a, a dang erawh midangin an tlanpel.
Arsenal bik hian record an nei ṭha lo, Krismas laia hmahruaitu ni chunga champion leh chuang loh hi vawi li lai an nei tawh - kum 2023 mai pawh kha hetiang dinhmunah hian an lo ding tawh, mahse an hlawhtling zui lo a ni.
Arteta-a'n squad tih chhah nan player a lalut nual a, hliam an neih lai pawhin an buai rih lo. Thlasik vanglai an tawng chho dawn a, tun hma ang khan an zui leh mai ringtu pawh an tam - North London club hian nomawi lak an duh takzet a nih chuan khaw vawt an paltlang thiam a ngai.
Hmasawn a ngai
Arsenal manager Mikel Arteta chuan, "Goal khat aia tam zawk chu khung thei tur kan ni a, hnehna kan chan avang khan lungawia ngaihṭha taka awm mai tur erawh chu kan ni bik lo, hmasawn ngaihna lai tam tak kan la nei ve bawk.
"Premier League hi chu a awlsam lo a, ngelnghet leh ṭha taka khelh theih reng phei chu a awlsam lo hle. Kuminah nghet takin kan khel thei a, tuna kan kal ang hian kal chhunzawm zel pawh kan tum ang," a ti a, a player hliam ṭhenkhat an dam ta chu lawmawm a tih thu a sawi bawk a ni.
Gunners hian kumin chhungin Premier League bikah Brighton leh Aston Villa te an la hmachawn leh dawn, league match pahnih bakah hian Crystal Palace nen League Cup quarterfinal khelh hmabak an la nei bawk a ni.