State Karate Championship-ah Kolasib an ropui

Mizoram State Sports Council Golden Jubilee lawmna chi khat atana neih, All Mizoram Karate Association (AMKA) State Karate Championship chu December 19, Zirtawppni Zan khan khelh zawh a ni a, Ferocious Dojo, Kolasib-in gold 19 ngawt lain team champion an ni.

December 17, Nilaini aṭanga neih ṭan inelnaah hian categrory hrang hrang 132-ah inel a ni a, kum nga hnuai lam aṭanga senior thlengin inelna neih a ni - karate thiam mi 430 an inlan a, KATA leh KUMITE mipa leh hmeichhiaah te an inel.

Aizawl West Joint YMA Hall-a neih championship-ah hian, Ferocious Dojo hian gold 19 an lak bakah, silver 13 leh bronze 19 an la tel a, gold 13 latu Tuikual North Dojo chu pahnihna an ni.

Pathumna hi inelna thlengtu Aizawl West Joint YMA Karate Academy (AMKA Main Dojo) an ni a, anni hian gold 12 an la thung.

Mipa zinga Best karate atan Hmangaihsangpuia, HHA chu thlan niin, Best Karate female-ah Tuikual North Dojo aṭangin Lalrinzuali chu thlan a ni thung.

Mizoram State Aids Control Society sponsor Karate championship hi minister B. Lalchhanzova'n a hawnna neiin, Zirtawpnia a kharna inkhawm chu Prof. Lalnilawma'n a hmanpui thung a, Minister hian championship lawmpuina thilpek a hlan bawk.