Chak loh nei loin Nagaland an tling

79th National Football Championship for Santosh Trophy 2025-26-ah Nagaland-in hneh loh nei loin final round an lut. Coach Lavoriyi Theluo hote hian Mizoram leh Manipur hnehin final round an lut a, match tawp berah inelna thlengtu Tripura nen 1-1 in an inhnehtawk.

Zirtawpni zan inkhelah Tripura-in Dewasish Rai hmangin minute 17-naah an khung hmasa a, tling chiang tawh Nagaland-in Laiwang Bohham hmangin minute 52-naah an sut. Goal dang a luh belh lo a, Nagaland-in point sarih hmuin group D pakhatna an ni.

Kumin Santosh Trophy-ah hian team 38 an tel a, team 35-in group stage an hmachhawn. Final round thlengtu tur Assam bakah nikum finalist West Bengal leh Kerala ten final round an lut nghal. Team dang 35 hi group pakuaah ṭhen niin group khat aṭanga sang ber ṭheuhin final round an lut dawn.

Nagaland bakah Punjab ten final round an lut tawh. Kum 2014 champion Mizoram erawhin Nagaland leh Manipur an hneh lo a, kum zawnin final round an khel dawn lo.