Chelsea leh Newcastle an inhnehtawk

Inrinni zan khan Chelsea chuan Newcastle United lakah goal hnih chhuah mah se second half-ah chhangletin 2-2 inkhel a tawp a, Enzo Maresca hoten point khat hlu tak an hlawh chhuak. Magpies tan Nick Woltemade-a'n goal hnih a khung a, Blues tan Reece James leh Joao Pedro ten an khung.

St. James Park a inkhelah hian inkhel ṭan aṭangin Newcastle an phur a, minute lina lekah goal a lut nghal. Ding lam sir aṭanga Jacob Murphy ball cross chu Anthony Gordon chuan goal-ah petin, Blues keeper Robert Sanchez chuan ṭha takin lo dang mah se a per let leh chu vengtu nei lo German striker Woltemade chuan an hmahruaina goal ni turin chiang takin a khung.

Hma an hruai hnuah Magpies an phur zel a, Chelsea insiamrem hmain goal an khung lehnghal. Woltemade bawk kan hmu - vei lam aṭanga Anthony Gordon ball cross chu goal-ah a chantir. Alexander Isak thlak nana an lak Woltemade hian tun season-ah match 14 aṭangin goal sarih a khung a, a che ṭtha thawkhat viau. Newcastle-in first half an thunun hle.

Amaherawhchu, Maresca-a'n halftime a hmang ṭha. Ṭan aṭanga minute lina lekah penalty box pawn deuh chiaha free kick an hmuh chu captain Reece James-a'n mawi zetin a pet lut a, Magpies keeper Aaron Ramsdale-a'n a ban phak lo - Chelsea an phur sawt.

Blues an vanneih chhunzawm a, minute 66-naah keeper Robert Sanchez ball petchhuah chu Joao Pedro chuan a lu hmangin ṭha taka Magpies defender Malick Thiaw a bum hnuah keeper chauh a hmachhawn a, a chance neih chu hmang ṭangkaiin an siphurh sut nan a hmang.

Goal hnih an khung hnuah Blues an inthlahdah a, mualneitu Newcastle-in na takin an nawr let. Harvey Barnes leh Anthony Elanga hmangin chance hlauhawm an nei a, an vanneih zan a ni lo. London club keeper Sanchez leh defender Reece James te an che ṭha ve bawk a, 2-2 in inkhel a tawp.

Inkhelh banah Chelsea coach Enzo Maresca chuan, "First half-ah kha chuan Newcastle-in chak an phu zawk a, second half-ah erawh chak kan phu zawk. Kan in draw hi a awm ve reng e," a ti. Chelsea hian point 29 hmuin palinaah an awm chhunzawm a, Stamford Bridge-ah December 27, Inrinni zan dar 11:00-ah Aston Villa an mikhual ang.