PSG-in French Cup Round of 32 an lut

French club lian PSG chuan Inrinni zan khan French fifth division club Vendee Fontenay chu 4-0 a sawpin, nuamsa takin French Cup round of 32 an lut.

Inkhelh ṭan a nih aṭangin PSG hian game an thunun nghal a, minute 25-naah rawlthar duhawm Desire Doue chuan goal kilah mawi takin a thun nghal a, PSG an phur sawt.

Minute 34-naah Portuguese striker Goncalo Ramos chuan penalty hlawh chhuakin, pet turin an thiampuipa Ousmane Dembele a rawn pen chhuak a, October hnua a goal hmasa ber atan a khung. Chawlhlawk hmain PSG in si hnihin hma an hruai a, Vendee Fontenay tan thawhchhuah a harsa tawh.

Second half khelh ṭan a ni a, PSG bawkin inkhel an thunun. Minute 53-naah penalty hlawhchhuaktu Ramos chuan Senny Mayulu ball cross chu awlsam takin a khung a, Ramos hian a duhtawk mai lo - minute 58-naah a goal hnihna leh an team goal lina ni turin a khung leh a, PSG hian inkhel thunun tluan zakin round of 32 an inpet kai.

PSG Coach Luis Enrique chuan, "Kan khelh ṭhat avangin inrintawkna kan neih phah a, chu chu Dembele tan a pawimawh a, a hliam a dam hnuah ṭtha takin minute 60 a khel thei a, a lawmawm hle," a ti.

French Cup round of 64 hi nizan khan khelh zawh a ni a, Ligue 1 pawh kum 2025 atan khelh zawh tawh niin, January 2 aṭangin khelh ṭan leh a ni ang.