Dortmund an sang zel

Borussia Dortmund chuan Inrinni zan khan Borussia Monchengladbach chu 2-0 a hnehin, table-ah pahnihnaah an chho.

Dortmund hian hrem vangin Jobe Bellingham leh AFCON khelh dawn avangin Rami Bansebaini te chhawr thei lo mah se harsatna an tawk lem lo.

Inkhel ṭantir aṭangin Dortmund hian an nawr nghal a, minute 10-na lekah ding lam sir aṭanga Nicklas Sule cross chu an hmahruaina goal ni turin Julian Brandt chuan mawi takin a hlap lut.

Dortmund hian goal an khung hnuah inkhel an thunun chhunzawm a, German winger Karim Adeyemi a hmuhnawm a, goal hnih khung theihna chance nei mahse a vanneih ṭum a ni tlat lo. Hun tawp dawn hnaiah Maximilian Beier chuan rawn khung belh ve lehin, harsa lutuk loin Dortmund an chak.

An chung chiaha awm RB Leipzig-in Bayer Leverkusen 3-1 a an hneh loh avangin Dortmund hian point 32 hmuin pahnihnaah an inhlangkai. Leipzig erawh an hneh loh Leverkusen nen an point hmuh zat inangin, goal difference-ah an tluk loh avangin palinaah an tla thung.

Nizanah khan Bundesliga hmahruaitu Bayern Munich an inlan a, an result kan hre hman lo - nizan inkhel hi kum 2025 atana Bundesliga match tawp ber tur a ni.