Roma hnehtu Juve beiseina a nung

Juventus chuan Serie A nomawi an beisei ngam ve a ni tih chu a takin an lantir leh ta - Inrinni zan inkhelah an mikhual AS Roma chu 2-1 in an hneh a, point thum hlu tak an hlawh chhuak.

Old Lady hian Serie A match 16 aṭangin point 29 an hmu a, hmahruaitu Inter Milan an phak lohna chu point li chauh a ni - Turin club hian match khatin khel tam mah se, nomawi chuh turin an tan kawng zau taka hawnsak an ni.

Allianz Stadium-a inkhelah, chawlhlawk hman dawnah goal khatna kan hmu. Minute 44-naah Francisco Conceica chuan an goal khatna khungin, second half-ah Lois Openda chuan a khung belh bawk, goal hnih an chhuah hnuah Roma lamin Tommaso Baldanzi hmangin sut ṭhen ve mah se, a tawp thlengin goal dang a lut zui tawh lo.

Roma coach Gian Piero Gasperini chuan, "Ṭha takin khel mah ila a hmawr bawk dawnah tak khan tihsual kan nei ṭhin a, kan tan chuan a harsa tawh a ni, ka naute khan khel chhe lo mah se goal hma zawna kan hriam loh chuan a harsa.

"Ka naute hian inkhel boruak sang hmachhawn tur leh, team lian dangte hmachhawn turin theihna an nei. Tun ṭum kha chu kan vanduai vang niah ka ngai - Juve kha team ṭha tak an ni bawk," tiin a sawi.

Hnehna changtu Juventus coach Luciano Spalletti erawhin a lungawi thu sawiin, "Football match hi chu bawm ruak ang mai a ni a, engmah lo aṭanga bul ṭan thar zel a ngai, tun ṭumah pawh khan bawm ruak chu ṭha takin kan hnawhkhat.

"Team ṭha leh lian, kan elpui kan hneh a ni a, hetiang inkhela chak hi chu match pahniha hnehna chan nen a inang, a chhan chu point thum kan hmuh bakah kan khingpuite point hmuh tur kan chhuhsak bawk a ni," tiin a sawi.

Kartawp Serie A inkhel dangah Lazio leh Cremonese te chu goal lut lo 0-0 in an inhnehtawk ve thung a ni.