Season tharah Wawrinka kan la hmu dawn

Stan Wawrinka chuan kum 2026 season hman turah inelna hmachhawn a la tum a, nakkum hnuah chuan hun rei tak a lo chenchilh tawh tennis chu chawlhsan a tum tih a sawi chiang.

Swiss star Wawrinkai hi player ṭha tak zinga mi a ni a, Grand Slam nomawi pawh pathum la tawhin, a vanglai chuan world number 3 dinhmun pawh a lo luah zak zak tawh ṭhin a ni.

Player ropui bik - Roger Federer, Rafael Nadal leh Novak Djokovic te vanglaia rawn chawr chhuak ve tho a nih avangin a tan nomawi chawi tam a harsa. Nadal hnehin Australian Open 2014-ah a champion a, Djokovic hnehin French Open 2015 leh US Open 2016 nomawi a chawi bawk, a sulhnu hi sawi nep chi a ni lo.

Kum 40 mi Wawrinka chuan, "Engkim mai hian inṭan hun leh tawp hun an nei zel a, ka tan pawh nakkum hi professional tennis player ka nih tawpna a ni tawh ang. Season khat chauh chu theihtawp ka chhuah leh dawn a ni," a ti.

Wawrinka hian kum 2002 khan a tennis zinkawng a zawh ṭan a, nomawi 16 a chawi zingah major title pathum telin heng bakah hian Masters title atan Monte Carlo 2014 khan a la bawk.

Nakkum March a kum 41 tling tur Wawrinka chuan, "Ka tennis zinkawng hi a ṭha thei ang bera khar ka duh, beiseina leh phurna ka la nei a, nei lo ni ila chuan ka inkhel chhunzawm tawh lo ang. Min ṭan tute hmaah theihtawp ka la chhuah dawn a ni," a ti.

A kum a tamin a vanglai a pel tawh a, tun hma angin Wawrinka hi nomawi chawi fo tura beisei chi a ni tawh lo. Chutihrualin, hliam nei loin a khel thei a nih erawh chuan player en manhla leh hmuhnawm zinga mi a la ni thei ang.

Wawrinka hian season thar a match hmasa ber atan United Cup team competition a khel dawn, inelna hi January 2 aṭangin Perth, Australia-ah khelh a ni ang.