I League ngaihtuah tur zingah MFA Secy

Indian football-a thuneitu sang ber All India Football Federation (AIFF) chuan, tun thlenga la khelh loh I League hma hun chinfel a nih theih nan member pathum awmna committee a din a, Mizoram Football Association honorary secretary Lalrengpuia a tel.

Renga bakah hian Andhra Pradesh Football Association president Kotagiri Sridhar leh Punjab Football Association honorary secretary Harjinder Singh te chu committee-ah hian an tel a, anni hi AIFF deputy secretary general M. Satyanarayan hoin an thawk ang.

Indian football-in buaina a tawk mek a, league sang ber Indian Super League leh I League chu tun thlengin season ṭan theih a la ni lo - I League-ah hian Aizawl FC leh Chanmari FC chu Mizo club inlan tur an ni a, I League hma hun chiang lo avangin player tam tak dinhmun lai takin an awm mek.

Hetihlai hian ISL club zinga 10-in ISL kalpui tura club chunga thuneihna pe mai tura ngenna chu AIFF Annual General Body (AGM) chuan a pawm lo a, ISL kal dan tur zirchiang tur committee a din thung.

ISL kalpui dan tur ngaihtuah tur committee-ah hian Kerala Football Association president Navas Meeran, Goa Football Association president Caitano Fernandes, Indian Football Association (West Bengal) honorary secretary Anirban Datta leh AIFF deputy secretary general M. Satyanarayan te an tel.

ISL zirchiang tura ruatte hian ISL club panga, Chennaiyin FC, Mumbai City FC, Delhi SC, NorthEast United FC leh Mohun Bagan SG te nen an kal zel dan tur an sawi ang a, AIFF Constitution su buai loa ISL kalpui dan tur chu an ngaihtuah tur a ni.