BCCI Tournament-a Mizo hmeichhe zinga century siam hmasa ber

BCCI Women's Under - 19 One Day Trophy Plate khelh mekah Mizoram chuan Meghalaya chu run 152-in an hneh a, he inkhelah hian Mizoram history-a a hmasa ber ni turin Tlangnuam tleirawl Vanlalruatpuii chuan century a siam.

Ruatpuii hian ball 156 a hmachhawn aṭangin run 115 lai a siam a, 6 run vawi hnih leh 4 run vawi 14 a vaw chhuak a ni.

Tun tournament khelh mekah hian Mizoram hi la chak vekin final a lut fel tawh a, December 23 hian he group a team ṭha bera ngaih Tripura nen final an khel ang.

Record siamtu Ruatpuii tho hian BCCI Tournament dang T20 format bikah Mizo hmeichhe zinga run vaw chhuak hnem ber record lo siam tawhin, kumin October 27 khan Sikkim lakah ball 66 aṭangin run 92 a siam tawh bawk.

Cricket Association of Mizoram (CAM) chuan hetiang player chhuanawm leh record ṭha siam thei Ruatpuii hi a chhuang takzet tih an sawi a ni.

Meghalaya lakah hian, ṭhum vawra vannei zawk Mizoramin vuak hmasak thlangin over 50 chhungin run 229 siamin wicket ruk an hloh. Opener Vanlalruatpuii'n ball 156-ah run 115 a siam a; Jacinta Lalṭanpuii'n run 55 siam vein, ani pawh hian match zawnin half century a siam a ni.

Bowling lamah Saron Lalremkimi'n wicket thum a la a, Jacinta Lalṭanpuii leh Zothanmawii Rokhum te'n wicket hnih ve ve an lain Jessica Lalmuanpuii'n wicket khat a la ve bawk. Meghalaya lam hi over 25.2 chhungin run 77 siamin an all out a ni.