Hahdama Krismas hmang tur Barcelona

Barcelona chuan hahdam takin Krismas an hmang thei dawn - Pathianni zan khan kumina an La Liga match hnuhnung ber an khel a, 2-0 a Villarreal hnehin, an hmahruaina an sawh nghet zel.

Barcelona tan hian Raphinha (penalty) leh Lamine Yamal ten goal khat ve ve an khung a, season duhawm tak hmangtu Villarreal-in a chhanletna tur an neih loh avangin an tlawm.

Yellow Subamrine vanneih zan a ni lo hrim hrim. Penalty hmangin goal hmasa ber an chhuah a, minute 39-naah Renato Veiga hnawhchhuah a nih bawk avangin an tan team ṭha zawk laka comeback a harsa tawh.

Barca hian table chung ber an luah chhunzawm a, pahnihna Real Madrid aia point lia sang zawk chungin kum an khar - Villarreal chak loh zana chak Atletico Madrid chu pathumna an ni thung.

Villarreal buaina

Pathianni zana Barcelona an mikhual hmain Villarreal hian an league match hnuhnung parukah hnehna an chang vek a, inringtawk tak chungin Barca an mikhual.

Villarreal hian inkhel ṭantir lamah chance an nei nual a, mahse, an vannei lo. Nicolas Pepe chuan hnai set sawt aṭangin a tauh out a, Ayoze Perez-a'n a chance neih a chhawr lo bawk.

Mualneituin inkhel ṭantir lama chance neih chhawr loh rah an seng zui a, minute 12-na lekah si an phur nghal. Santi Comesana chuan Raphinha a tihtluk avangin penalty a chawi - Brazilian forward hian a penalty hlawhchhuah hi goal-ah a chantir.

Minute 39-naah Villarreal vanduaina chu belhchhahin a awm a, Chelsea aṭanga an lakluh Renato Veiga chu Lamine Yamal lakah hlauhawm takin a che a, hnawhchhuah a ni.

A harsa

Barca-in 1-0 in hma an hruai a, player tam zawka an khelh bawk avangin Villarreal tan a harsa dawn tih a chiang tawh - goal hmahruai khungtu Raphinha-a'n crossbar a pet perte chu uiawm tak a ni.

Chawlhlawk hmain mualneitu team hian si phurh an sutah an inngai hman a, mahse, Jules Kounde-a'n Sergi Cardona-a cross an lama a tihluh chu offside vangin pawm a ni lo!

Second half-ah Barca khel a nung sawt a, Fermin Lopez-a shot Villarreal goalkeeper Luiz Junior-a'n a lo dante chu uiawm tak a ni. Minute 63-naah Barca an vannei ta nge nge a, Yamal chuan Villarreal beiseina beng dai turin an goal hnihna a khung.

Villarreal hi an beidawng mai duh lo. Mahse, Georgian forward Georges Mikautadze-a'n Barcelona goalkeeper Joan Garcia chiah hmachhawn chungin a khung thei lo a, Barca-in 2-0 a hnehna changin, an hmahruaina an sawh nghet.