Bayern-in goal li nen kum tawp an khar

German champion Bayern Munich chuan Pathianni zan khan Heidenheim tlawhin goal li an khung a, table-ah hmahruaitu nih chhunzawm zelin kumin atana an match hnuhnung berah an nuamsa takin an chak.

Inkhel ṭan a nih aṭangin Bayern hian inkhel an thunun nghal a, minute15-naah Michael Olise corner pet aṭanga ball kal zel chu Croatian right back Josip Stanisic chuan an hmahruaina goal ni turin a pet lut a, Bayern an phur sawt.

Minute 32-naah ding lam sir aṭangin tun hnaia che ṭha tak German rawlthar Lennart Karl ball thawn luh chu Heidenheim goalkeeper Diant Ramaj chuan nam chhuak mah se a per let chu Michael Olise chuan hnai tak aṭangin a khung. Bavarians-in chawlh lawk laiin goal hnihin hma an hruai a, mualneitu Heidenheim tan thawh chhuah a harsa tawh.

Second half ṭan a nih hnuah Bayern bawk an hmuhnawm a, goal erawh an khung lawk lo. Minute 86-naah hrem tuar zo hlim Luiz Diaz chuan Josip Stanisic cross chu a tauh lut. Bayern-in an la duhtawk mai lo–hun pek belhah English striker Harry Kane chuan Serge Gnabry pass chu mawi taka a vir kualpui hnuah defender bum lehin goal kilah cool takin a khung a, Kane hian tun season-ah match 15 a khelhna niin goal 19 a khung tawh.

Champion lai Bayern hian point 41 hmuin table-ah pakhatna an nih chhunzawm zel a, an hnuai chiaha awm Dortmund nen point kuain an inthlau mek. January ni 11, zan dar 10:00 ah kum thar atan an match hmasa ber ni turin Wolfsburg an lo mikhual dawn a ni.