Goal thum khungtu Atletico

Atletico Madrid-in La Liga nomawi beiseina an la thlah duh bik lo - Pathianni zan khan an mikhualna ramah Girona chu 3-0 in an hneh a, Villarreal an tlawm bawk avangin table-ah pathumna an ni ve leh ta.

Diego Simeone-a enkawl team hian first half-ah goal hnih an khung hman a, minute 13-na lekah Koke chuan goal hmahruai khungin, minute 38-naah Conor Gallagher chuan a belhchhah ve leh bawk.

Atletico-in 2-0 a hmahruai chungin chawlhlawk an hmang a, an goal thumna hmu tur erawhin an nghah ve hret a ngai - hun pek belh minute hnihnaah Antoine Griezmann chuan an goal thumna a khung.

Kum 34 mi Griezmann hi a vul thar hle - Atletico tana a match hnuhnung pathumah goal li a khung a, Copa del Rey round of 32-a Atletico Baleares an hmachhawnn tih loh pahnihah hi chuan bench aṭang ve vein a lut a, a bul ṭanna inkhelah hian goal hnih a khung bawk.

French striker Griezmann-a kum a tam ve tawh a, Atletico-ah pawh player pawimawh ber ṭhin kha a ni tawh bik lo. Tun season inelna hrang hrangah match 25 khel tawhin, heng zinga match 16-ah hian bench aṭangin a lut a, vawi kua chiah bul a ṭan.

Match kuaah chauh bul a ṭan chungin, match sarih ngawt chu lakchhuah a ni bawk - heti chung hian goal kua a khung tawh a, assist vawi khat a nei tel.

Tun hnaiah Griezmann hian MLS, Saudi Arabia leh UAE lam aṭangin rimtu a nei a, amah ber hian US lama hun tawp khar a hreh loh avangin, amah rimtu anga an sawi Charlotte FC lamah a kal lo ang tih a sawi theih loh.

Hetihrual hian Saudi club Al Ahli leh UAE club ṭha Al Wahda te hian an ngam huai viau nia sawi a ni a, thawnthu a la danglam thei viau ang.