Thla hnih chawl tur Isak

Liverpool striker Alexander Isak chu Tottenham Hotspur nen an inkhelh ṭuma a hliam avangin thla hnih tal a chawlh a ngai dawn a, Premier League champion chuan an striker hian a kerekah hliam a neih thu an sawi.

Reds coach Arne Slot chuan, "Isak hi thla engemaw zat a chawlh a ngai dawn a, a tan chauh ni lo, keini tan pawh a lawmawm lo hle a ni," a ti a, pound maktaduai 25 man striker hliamtu van de Ven a dem bawk.

Slot chuan, "Ka ngaihdanah chuan Van de Ven-a chet dan kha atthlak tak a ni," a ti a, "Xavi Simons pawh kha inkhelah khan a foul avangin red card pek a ni. Mahse, ani erawh a tum reng vang a ni lo," a ti!

Dutch coach hian Van de Ven hi Isak hliam tum ve rengah a ngai a, hrem a lo ni lo bawk nen, a hrethiam lo a ni ber. Slot chuan, "Khatiang thil kha vawi 10 thleng ta se, player chu vawi 10 a inhliam ang," tiin Dutch defender chet dan a hlauhawm thu a sawi.

Hetihlai hian Tottenham Hotspur boss Thomas Frank chuan Van de Ven chu mi tihnat tum renga che chi a nih loh thu a sawi thung. Liverpool hian kha inkhelah khan 2-1 in hnehna an chang a, Inrinni zanah Wolverhampton Wanderers an mikhual zui ang.

Isak hian Liverpool a pan hnuah beisei a phak lo. Match 16 a khelh tawhah goal thum chiah a la khung a, assist vawi khat a nei.