Messi lo kal aṭangin zir tur kan nei - Bhaichung

Lionel Messi-a'n India ram a tawn tlawh chuan nghawng hrang hrang a nei a, India captain hlui Bhaichung Bhutia chuan Messi boruak aṭang chuan infiamna huangah chuan infiammite pawimawh ber se tih chu zir chhuah tham a nih thu a sawi.

Argentina captain Messi hian India ram khawpui hrang hrang a tlawh a, inkhel lo mah se stadium chhunga a chevel hmuh tumin mi tam tak an fuan khawm. Salt Lake Stadium, Kolkata-ah chuan mipui lamin Messi hi an hmu thei lo a, buaina a chhuah phah.

Bhaichung-a chuan, "Infiamna a nih chuan infiammi te pawimawh ber se la, thil dang vanga hun khawhral leh infiammite zawkin mi pawimawh dangte an lo nghak ṭhin te hi a ṭha lo, tun ṭum thil thleng aṭang hian kan harh a ngai.

"Mipui hi inkhel en duha kal khawm an ni ṭhin, kan ramah chuan hetiang mipui kalkhawmte hian hun rei tak tak chhung VIP an nghah a ngai a, thusawi ngaihthlak leh inchibai te hian hun a la hek lutuk ṭhin," a ti.

Messi lo kal chungchang sawi zuiin Bhaichung chuan, "Kolkata a thil thleng chauh hi a ni lo, hmun dangah pawh hetiang thil hi chu a thleng fo. Tun ṭumah kha chuan Messi hmuh duha kalkhawm te khan thil dang zawk an hmu tam mah mah.

"Tun ṭuma thil thleng aṭang hian inzir ila, kan hun lo kal leh zel turah chuan felfai leh ṭha zawkin, infiamna hmunah chuan a pawimawh tur dik tak an pawimawh theih tawh ka beisei," tiin a sawi.

Messi hi politician leh milar tam takin an bawr a, a bul hnaiah an kal hual tuau tuau reng avangin stadium chhunga lut tan pawh duh anga hmuh theih a ni ṭhin lo a ni.