Liverpool-in Jota an hre reng

Premier League champion Liverpool chuan zanin dar 8:30 hian league match khel turin Wolverhampton Wanderers an mikhual dawn a, July 3-a car accident vanga Diogo Jota a thih hnua a club hlui pahnih intawn hmasak ber tur a ni.

Liverpool chuan an player hlui hi hre rengin, zanin inkhelah hian Jota fapate pahnih, Dinis leh Duarte te chu inkhelh dawna khelmuala naupang an hruai luh ṭhin zingah an tel ve dawn.

Reds manager Arne Slot chuan, "Thla 12 liam ta chhunga thil thleng zawng zawng han thlir khan, hlimna leh lungngaihnate a inpawlh vel a ni ber e. A bik takin Jota chhungte ka ngaihtuah a, a tel loa Krismas an hman hmasak ber lunglenthlak turzia pawh ka hrethiam.

"Anmahni hnem turin engmah tih theih ka nei lo a, kawng kawhhmuh theitu ka ni hek lo. Mahse, Diogo kaltlanga hmangaihna leh duhsakna tam tak lang chhuak hian an rilru a thawidam ka beisei," a ti.

Liverpool tan vawi 182 a khelha goal 65 khungtu Jota hian kum 2020 khan Wolves chhuahsanin Liverpool hi a zawm. Reds hi zaninah an ṭhat dan berin an inlan thei dawn lo - Alexander Isak, Wataru Endo, Joe Gomez leh Giovanni Leoni te chu hliam vangin an chawl mek a, Conor Bradley dinhmun a chiang lo bawk.

Hrem vangin Dominik Szoboszlai a inlan thei dawn lo a, Mohamed Salah chu AFCON khelin a thang bo mek bawk.