Rice hi England captain tur a ni - Rooney

Manchester United srtiker hlui Wayne Rooney chuan Arsenal midfielder Declan Rice chu Harry Kane hnuah England captain awm ber a tih thu a sawi.

England tana vawi 72 inlan tawh Rice hian captain ni lai Harry Kane awm loh laiin 2024 March-a Belgium an hmachhawn ṭum leh kumin October-a Wales an hneh ṭum khan captain armband a lo hreng ve zeuh tawh.

England tan pawha captain lo ni tawh Rooney chuan, "Rice hi Harry Kane chawlh huna captain awm ber a ni. Everton lakah pawh khan ground chhung a cover hneh em em a, pass hun, pass-na hmun leh a ke ding lam leh vei lam hman a hre em em bawk chu hmuhnawm tham a tling, a thiam ka ti hle.

"A taima em em a, goal mamawh hunah tlarhma lamah a hlauhawm viau bawk. A nungchang leh mizia thlengin a dik em em a, ram tan chuan thlak thiang lo a ni.

"Ka ngaihdanah chuan ram tana captain ni mek Kane thlaktu an awm dawn a nih chuan Rice ngei hi a ni a, England tan hlawhtling takin hruaitu ṭha tak a nih ka beisei," tiin kum 26 mi Declan Rice chu England captain thar atan a duh hle.

Rice hi Arsenal midfielder rinrawl a ni mek a, North London club bakah hian Three Lions tan an thiampuipa a ni bawk.