United-in ṭhenawm bengchheng City an ngawihtir

Manchester United chuan Pep Guardiola hoa inkulh Manchester City khelmual Eithad Stadium chu an luhchhuah a, Ole Gunnar Solskjaer hnuaia mit an tlung ber ṭum a ni hial ang.

Pathianni zan Manchester Derby-ah hian Marcus Rashford penalty leh Anthony Martial finishing tawih tak hmangin United-in goal an khung hmasa a, City hian Nicolas Otamendi hmangin siphurh sut ṭhen mah se 2-1 in inkhel a tawp.

Manchester khawpuiah United an pawr a, Premier League-ah erawh Liverpool an kal fawr chhunzawm. Jurgen Klopp-a hoten Sadio Mane awltir chungin Dean Court-ah Bournemouth chu Alex Oxlade-Chamberlain, Naby Keita leh Mohamed Salah te goal hmangin 3-0 in an hneh. Reds hian champion lai Man City lakah point 14 in hma an hruai fal a, an la chawi ngai loh Premier League nomawi an hnaih zel.

Manchester United-in Jose Mourinho kaihhruai Tottenham Hotspur an hneh zawhah Etihad Stadium an tlawh a, chak mamawh Man City hmachhawn mah se a tir aṭangin an nawr ngam. Goal chance tamna inkhelah Bernardo Silva-a'n ball tel loa Rashford a nek tluk avangin penalty a chawi a, VAR hmangin thutlukna siam niin English striker hian minute 23-naah Ederson bumin goal hmahruai a khung.

City tan Kevin de Bruyne hmuhnawm mah se a ball pek Gabriel Jesus-a'n a hmang ṭangkai thei lo a: United wing back Aaron Wan-Bissaka leh Luke Shaw te an khelh ṭhat avangin Pep-a hoten ṭum dang angin mualsir an hmang ṭangkai thei lo.

United forward Rashford bawk a langsar a, English forward hian keeper Ederson chauh a hmachhawn hnuah goal zawnah a pet lo, hei bakah hian crossbar a pet per bawk. Man City-in an tlarhnung pawp siam ṭhat an harsat avangin Anthony Martial-a'n ṭha zetin minute 29-naah goal hnihna a khung a, Etihad Stadium-ah mikhual team an tlangnel hle.

Manchester United-in chak phu mah se Man City vanduai ṭum an tawng. Victor Lindelof leh Fred ten box chhungah an kutin ball an khawih ve ve a, a hnuhnung zawkah VAR hman a nichungin Man City-in penalty an hmu lo.

Minute 85-naah Otamendi-a'n siphurh sut ṭhen mah se point an hlawh chhuak lo. Manchester City boss Pep Guardiola chuan, "Kan chak lo a, chutichung chuan ka naute ka chhuang hle. An khel ṭha a, team ṭha tak kan ni," tiin a naute a dem duh lo.

Pep chuan sawi chhunzawmin, "Liverpool hi match 16 aṭangin vawi 15-ah an chak a, chuvangin nomawi humhim a har dawn. Nomawi hi kan theihnghilh a, kan khelh hmabak ṭha taka kan khelh a ṭul a ni," tiin a sawi.

United-in Manchester City an hneh hnuah pawh point 24 hmuin panganaah an awm pha chauh. Chutihrualin Ole Gunnar Solskjaer hnuaiah United-in club lian Chelsea (4-0), Leicester City (1-0), Arsenal (1-1), Liverpool (1-1), Chelsea (2-1, EFL), Tottenham (2-1) leh Man City (2-1) lakah chak loh an nei lo a, Man City an hneh hi an result ropui bera ngaih a ni.

Norwegian manager Ole Gunnar Solskjaer chuan, "Khawvela team ṭha ber zinga mi kan hmachhawn a, kan khelh dan hmang kan bel tlang hle. Ball kan chan apiangin khingpuite kan chhaih buai thei zel a, ka lawm hle. Chutihrualin Man City ṭhatna ber pawh ni lo corner aṭanga goal kan chhuah erawh pawi ka ti," tiin lawm a kim loh thu a sawi.