Arsenal-in kum tawp an khar ṭha

Premier League hmahruaitu Arsenal-in Thawhlehni zan khan anmahni hnaihtu zinga mi Aston Villa 4-1 in an sawp. Mikel Arteta hoten pakhatna nichungin kum 2025 an khar a, Gunners-in inrintawkna an nei let a, Manchester City nen an inkarah point nga a awm.

Emirates Stadium-a inkhelah first half-ah goal a lut lo a, second half-ah mualneitu tan Gabriel Magalhães, Martín Zubimendi, Leandro Trossard leh Gabriel Jesus ten goal khat ṭheuh an khung. Gunners-in goal li an khung hnuah Villa-in injury time-ah Ollie Watkins hmangin goal khat an khung ve hram.

December 8 hnuah Gabriel leh William Saliba te tlarhnungah an inkawp a, mamawh hunah goalkeeper David Raya a che ṭha bawk nen Arsenal tlarhnung a phui leh tawh hle. Spanish manager Arteta chuan, "Point thum kan hlawh chhuak a, chu chu a pawimawh lai ber a ni," tiin a sawi a, an elpui an sawp avanga ṭawng pawr a tum lo.

Arsenal elpui ber Manchester City-in January 1, Ningani zan dar 1:30-ah Sunderland an tlawh dawn a, Pep Guardiola hoten an inkar hi tihzim lehnghal an tum dawn. Thlasik bazarah City hian Antoine Semenyo an lalkluh a rinawm a, Semenyo hi kartawpa Bournemouth leh Arsenal inkhel turah pawh a inlan dawn lo.

Cherries hian nizan khan Stamford Bridge-ah Chelsea an chelh a, 2-2 in an inhnehtawk. Enzo Maresca hoten champion an hlat zel a, a sang palia awm theihna hun ṭha an bawhpelh bawk. Manchester United an danglam lo a, an mualah table mawngphaha awm Wolverhampton Wanderers nen 1-1 in an inhnehtawk.

Ruben Amorim-a'n hliam leh AFCON vangin player ṭhahnem tak a chhawr thei lo a, chutihrualin tun season-a chak la nei lo Wolves lakah erawh point thum hlawh chhuak tur an la ni. Wolves hian match 12 a zawnin an chak lo tawh a, an record chhe tak hi Old Trafford-ah titawpin tun season-a point thum an hmuhna chiah a ni.