Draw-a kum bul ṭantu Liverpool leh City

Premier League club lian pahnih Liverpool leh Manchester City te chuan an tumpui te lakah goal an khung theih loh avangin draw nen kum bul an ṭan a, hmahruaitu Arsenal hmahruaina a zau sawt.

Champion lai Liverpool chuan Anfield ah Leeds lo mikhualin, inkhel ṭan a nih aṭangin Liverpool-in inkhel an thunun nghal. Hugo Ekitike leh Florian Wirtz hmangin chance an nei nghal a, goal erawh an thun thei lo. Mikhual Leeds pawh chance nei lo tawp an ni bik lo, Reds keeper Alisson Becker tihsual chu khung ngat se inkhel thlak danglam thei tur a ni.

Minute 30-naah Ekitike bawk kan hmu leh, Jeremie Frimpong ball cross chu hnai tak aṭangin goal ruakah a tauh lut lo a, French striker vanneih zan a ni lo.

Second half-ah pawh mualneitu bawkin inkhel thunun a, Conor Bradley leh Dominik Szoboszlai te hmangin chance nei mah se Leeds defender te an din khawng ṭhat avangin goal an khung thei lo. Hun tawp dawn hnaihah erawh Leeds an langsar thung a, bench aṭanga rawn lut Dominic Calvert-Lewin chuan vei lam sir aṭanga a ball hmuh chu defender venna hnuaiah ṭha takin khung mah se a offside avangin pawm a ni lo thung. Leeds bawk hlauhawm chhunzawmin, vei lam sir aṭanga Ilia Gruev ball cross hlauhawm tak chu Leeds player dangin an khawih hmain Van Dijk chuan lo pet chhuakin, goal lut loin inkhel a tawp zui.

Inkhel zawhah Liverpool coach Arne Slot chuan "A pawimawh ber goal kan khung thei lo a, league-ah ball possession nei ṭha ber kan ni a, mahse goal kan khung theih loh avangin chu chuan awmzia a nei lo," tiin goal an khung thei lo chu pawi a tih thu a sawi.

Hetihlai hian Manchester City pawhin an mikhualna ramah tun season-a che ṭha tak Sunderland lakah goal an khung theih loh avangin draw result-ah an lungawi a ṭul a, hmahruaitu Arsenal nen an inkar a zau sawt.

Stadium of Light a inkhelah hian a tir aṭangin inkhel a nung nghal a, team pahnihte an inhlauh loh avangin chance pawh an inneih chhawk zak zak. City midfielder Bernardo Silva chuan corner aṭangin goal a khung emaw a inti hman a, offside vangin pawm a ni lo thung. Minute 18-naah Sunderland striker Brian Bobbey chuan a ball hmuh chu keeper chauh a hmachhawn hnuah a khung thei lo a, City keeper Gianluigi Donnarumma chuan a dang ṭha hle.

City-in ball chang tam zawk mah se goal an khung thei lo a, mualneitu Sunderland lamin chance hlauhawm an neih ve reng bawk avangin thlamuangin City an awm bik lo. Black Cats hi Swiss midfielder Granit Xhaka hoa an din khawng tlat avangin goal lut lo in inkhel a tawp.

City boss Pep Guardiola chuan "Helai hmun hi inkhelh harsa tak a ni, kan chance neih te chhawr ṭangkai theih lo mah ila kan khelh ṭhat avangin kan result ah ka lungawi. Ni thum hnu lawkah Chelsea kan tum dawn avangin indawm kun hman kan ni lo," tiin a sawi a, goal khung lo mah se a naute chu an khelh ṭhat thu a sawi.