MBBA leh Zonet-in contract pawtsei

Mizoram Basketball Association chuan Zonet Cable TV Pvt Ltd nen thawk dunin Mizorama basketball inelna sang ber Mizoram Super League chu hlawhtling takin season nga chhung an kalpui tawh a, season nga dang thawk dunin turin Inrinni khan Zonet Studio-ah inremna an ziak.

MBBA president Dr. Lalrinawma Hnamte chuan, "Inremna lawmawm tak a ni a, hmasawnna nasa tak kan neih theih nan MBBA-in mawhphurhna lian tak kan nei a ni," tiin a sawi. Zonet director LV Lalthantluanga pawhin, "Mizo basketball-in hma a sawn hi kan duh ber a, kan hlawhtlinna hi Mizoram chhungah mai tawp lovin National lamah pawh he MSL vang hian a hma aia result ṭha kan neih ka beisei a ni," tiin Vanglaini a hrilh.

Inremna ang hian MSL season 6-10 khelhna tura sum mamawh tura chhut lawk cheng nuai 50 chu Zonet Cable TV Pvt. Ltd. in a tum ang a, MSL game zawng zawng ZONET in live- in a pe chhuak ṭhin ang a, inkhelh dan tur ruahmanna zawng zawng MBBA lamin an siam ṭhin dawn thung a ni.