Mizoram an chak lo vek

Syed Mustaq Ali Trophy (plate group) champion zo hlim Mizoramin Vijay Hazare Trophy-ah beisei an pha lo. Mizoram hian January 3, Inrinni khan Bihar chu wicket ngain an hneh lo a, tun ṭum inelnaah hian an khingpui an hneh lo vek.

Mizoram hi plate group-ah Meghalaya, Arunachal Pradesh, Nagaland, Manipur leh Bihar te nen an awm ho a, Syed Mustaq Ali Trophy-ah nomawi an chawi avangin beisei pawh an nei sang hle. Mahse, Mizoram (291) hian December 24, Nilaini khan Meghalaya (212) 79 runs-in an hneh lo.

December 26, Zirtawpniah Arunachal Pradesh (254) nen an inkhel leh a, Mizoram (219) hi 35 runs-in an chak lo. December 29, Thawhṭanniah Nagaland (388/4) lakah 177 runs-in an mualpho a, December 31, Nilainiah Manipur (205/2) lakah wicket riatin an tlawm.

Inrinniah Usha Martin Ground, Ranchi-ah Bihar nen an inhmachhawn a, Mizoramin bat hmasak thlangin 258 runs an siam. Condanda Ajit Karthik (73) leh Joseph Lalthankhuma (63) te half century siam a tawk lo a, Bihar-in over 34.1 lekah 262/5 runs siamin hnehna an chang. Mizo tan Krismas vuakveta inkhelh a harsa tih a lang a, chutihrualin India rama lang pha tur chuan insiamṭhatna tur a tam hle.

India ramah hian BCCI-in state inelna lian pathum a buatsaih ṭhin a, Vijay Hazare Trophy bakah Ranji Trophy leh Syed Mushtaq Ali Trophy te a buatsaih. Ranji Trophy hi ngaihhlut ber niin, ni li chhung (multi day) hmanga inelna a ni a, Vijay Hazare Trophy hi over 50 hmanga inelna niin Syed Mushtaq Ali Trophy hi over 20 hmanga inelna a ni thung.