AFCON Round of 16 khel ṭan

African Cup of Nations 2025 chu group stage khelh zawh a ni tawh a, round of 16 khelh ṭan nghal a ni.

Group stage khelh zawh takah champion tura rinkai zinga mi Algeria leh Nigeria chu chak vek awm chhun an ni a, an awmna group-ah hmahruaitu ni chungin knockout stage an lut.

Mohamed Salah chuan an ram Egypt chu point sarih hmuhpuiin Group B hmahruaitu ni chungin knockout stage a luhpui. Tournament thlengtu Morocco pawhin point sarih hmuin group hmahruaitu an ni a, an match hnuhnung bera Zambia an sawp ṭumin an captain Achraf Hakimi chu bench aṭangin a lut tawh bawk. Hakimi hian tun AFCON-a a match khat khelhna a ni.

Nigeria chuan Group C thununin an chak vek. Galatasaray forward Victor Osimhen hoa khel Nigeria hian goal riat an khung tawh a, Osimhen bakah Atalanta forward Ademola Lookman an kawl tel a, anni pahnih bakah hian player langsar an tam avangin Nigeria tan champion a beisei ngam.

Group E-ah Algeria chuan hma hruaiin an match khelh tawh pathumah hnehna an chang vek. Algeria innghahna an captain Riyad Mahrez chu a khel ṭha thei hle a, goal thum khung tawhin Morocco player pahnih Ayoub El Kaabi leh Brahim Diaz te nen goal khung hnem ber an ni mek. Thawhlehni zan dar 9:30 ah hian DR Congo nen quarterfinal luh an inchuh dawn a ni.

Champion tura beisei zinga ram pahnih Ivory Coast leh Cameroon pawhin Group F lamah tlawm nei loin round of 16 an lut. Point sarih ve ve an hmuh bakah an goal difference inang mah se champion lai Ivory Coast chu goal an khung hnem zawk avangin group F hmahruaitu an ni.

Hetihlai hian Gabon erawh an match khelh zawng zawngah an tlawm vek avangin point hmu loin AFCON an mangṭha. An result a chhiat em avangin Gabon Football Association chuan coaching staff te leh player zawng zawngte chu an suspend vek a, team captain Pierre-Emerick Aubameyang chu an ban hial.

Heng bakah hian Group tin aṭanga pathumna khel ṭha zual Mozambique, Benin, Sudan leh Tanzania te chuan round of 16 an lut a, Angola leh Comoros te chu midang aia an goal difference a chhiat avang leh goal an khung tlem zawk avangin knockout stage an lut pha lo.

Hetihlai hian Round of 16 match hmasa ber chu Inrinni zan khan khelh a ni a, Senegal chuan Sudan chu 3 - 1 in an hneh. Grand Stade de Tanger a inkhelah hian Sudan zawkim hma hruai hmasain, minute rukna lekah Aamir Abdallah Yunis chuan hmahruaina goal a khung a, Sudan an phur hle.

Amaherawhchu Senegal-in awlsam taka tlawm an tum lo. Villarreal midfielder Pape Gueye chuan minute 29-naah an si phurh sutna goal a khung a, first half hun pek belhah hmahruaina goal a khung leh bawk. Senegal-in second half an thunun chhunzawm a, minute 77-naah PSG forward kum 17 mi Ibrahim Mbaye chuan goal a khung belh leh a, Sudan tan thawhchhuah ngaihna a awm tawh loh avangin Senegal chu quarterfinal lut hmasa ber an ni.

Round of 16 inkhel dangah vannei takin Mali chuan Tunisia hnehin quarter-final an lut - hun pangngaiah team pahnih hi 1-1 in an inhnehtawk a, penalty hmanga chak zawk zawn a nih hnuah, 3-2 in Mali an chak.

Stade Mohammed V-a inkhelah hian minute 26-na lekah Mali-in red card an hmu! Sassuolo full back Woyo Coulibaly chuan Man United midfielder hlui Hannibal Mejbri a rah avangin red card a hmu a, Mali an bet nghal.

Goal lut loa inkhel a tawp mai dawna a lan hnuah minte 88-naah Firas Chaouat chuan Tunisia hmahruaina goal a tauh lut. Tunisia an chak mai dawna a lan laiin penalty an chawi hlauh. Hun pek belha Mali freekick aṭanga ball lo kal chu Tunisia defender Yassine Meriah chuan a kutin a lo khawih palh.

Mali forward Lassine Sinayoko chuan a hun ṭha neih chhawr ṭangkaiin an penalty hmuh chu an si phurh sut nan a chhuih lut. Extra time-ah goal a luh tawh loh avangin penalty shootout hmanga chak zawk zawn a ngai. Tunisia zawk vanduai zawkah ṭangin, Mali-in 3-2 in penalty shootout hmangin quarterfinal an lut. Zirtawpni hian Sengal nen an inhmachhawn leh ang.