Point thum nena kum thar bul ṭantu Barcelona

Barcelona chuan kum thar hnua an La Liga match hmasa berah hnehna an chang nghal a, Catalan derby-ah Espanyol chu 2-0 in an hneh.

Espanyol khelmualah Barca tan Dani Olmo leh Robert Lewandowski ten goal khat ve ve an khung a, mualneitu team-in a chhanletna tur an neih loh avangin Barcelona an chak.

Barcelona-in hnehna an chan avangin La Liga table chung berah an dinhmun an sawhngheh chhunzawm a, pahnihna Real Madrid aiin point sarihin an sang zawk.

Nizan khan Real leh Atletico Madrid te an inlan a, he thu buatsaih a nih lai hian result kan hre hman lo. Real hi an chak a nih chuan Barca nena an inkar hi a zim leh sawt ang.

Beisei aia har

Catalan derby-ah Barcelona-in an beisei angin goal an khung lawk thei lo a, inkhel boruak a nung ṭha hle - minute lina lekah Espanyol tan Tyrhys Dolan chuan chance duhawm a nei a, mahse, a chhawr lo.

Nipui laia Espanyol chhuahsana Barca pantu keeper Joan Garcia a che ṭha a, a club hlui lakah save ṭha vawi tam a nei a, Barca-in an beisei aia tam shot an hmachhawn!

Barca pawhin chance an nei a, mahse, a pawimawh ber goal an khung theih miau loh avangin an talbuai tlat. Hansi Flick pawhin a hlauthawng tih hai rual a ni lo a, minute 64-naah a rualin Pedri, Dani Olmo leh Lewy te a luhtir.

Minute 72-naah Eric Garcia chuan Barca tan chance duhawm a nei a, mahse, Espanyol keeper Marko Dmitrovic chuan ṭha zetin a dansak.

A tawpah chuan

Barca-in goal an khung lo reng a, point khatah lungawi an zir mai dawn niin a lang hman. Mahse, minute 86-naah ngaihdan dang neitu Olmo a inlar a, Barca tan goal hmahruai a khung.

Minute li hnu lawkah Lewy inlar ve lehin, kum 37 mi striker hian Barca chak nemnghehna goal a khung a, Polish striker-in khelmualah a la tar lo tih a tarlan chhunzawm.

Barca-in minute 80 hnu lamah goal hnih an khung a, goal hnih thawk chhuaktu player pathumte chu Flick-a'n bench aṭanga a luhtirte vek an ni!

Minute 64-naa a ruala lut Olmo leh Lewy ten goal khat ve ve an khung a, player pahnih goal khung hi second half ṭantirha luhtir Fermin Lopez-a siamsak ve ve a ni thung.