UK lamah Joshua a kir tawh

December 29, Thawhṭanni zana car chesuala chuang Anthony Joshua chu damdawi ina enkawl a nih hnuah, an ram UK lamah a kir leh tawh a, accident-ah khan a ṭhian ṭha tak pahnih a chân.

Kum 36 mi Joshua hi a ṭhiante pahnih leh, a team zinga mi Sina Ghami leh Latif "Latz" Ayodele te nen chetsualnaah hian an chuang ho a, an car tlan chak avangin an chesual.

World heavyweight champion hlui Anthony Joshua leh a ṭhiante hi Nigeria-a khawpui pakhat Lagos daifemah an chesual a, truck an su niin khawthlang media-te chuan an tarlang.

Joshua hi damdawi inah hruai vat niin, Nilaini khan damdawi in aṭang hian a chhuak a, tunah chuan UK lamah a haw ta a ni.

Hetihlai hian Joshua-te motor chuanna khalhtu, kum 46 mi driver Adeniyi Mobolaji Kayode chu thubuai siamsak a ni a, a thubuai neihah hian hlauhawm taka motor khalh vanga thihna thlen chungchang a tel avangin a hremna hi a nep lo ang.

Heavyweight boxer rothap Joshua hi Watford, UK-a piang leh seilian ni mah se, an chetsualna bul hnaia Sagamu khuaah a chhungte ṭhenkhat an cheng nia sawi a ni a, a chhungte nena kumthar hman ho tuma Nigeria-ah hian kal an ni.