Villarreal an insiamṭha

Tun season-ah Villarreal-in beisei phak bakin season an hmang ṭha a, mahse, December erawh kha chu an tan thla duhawm lo a ni - inelna hrang hranga match nga an khelhah vawi hnih chiah an chak.

Copa del Rey round of 32 an luh thla a ni a, an tlak thla a ni bawk! Champions League an match-ah Copenhagen chu 3-2 in an ngam lo a, Krismas hmaa an league match hnuhnung berah 2-0 in Barcelona an ngam lo bawk.

Mahse, kum a thar meuh chuan Yellow Submarine hi an insiamṭha leh tawh a, Inrinni zan khan an mikhualna ramah Elche chu 3-1 in an hneh.

Villarreal tan hian Alberto Moleiro, Georges Mikautadze leh Alfonso Pedraza ten goal khat ṭheuh an khung a, Elche tana Martim Neto goal khungin awmzia a nei phak lo.

Mikhual Villarreal-in hnehna an chan avangin La Liga table-ah pathumna an ni mek a, nizan inkhelah Atletico Madrid-in hnehna an chan chuan palinaah an tla leh thung ang.