Milan an chak nghal

January 2, Zirtawpni zan khan AC Milan chuan kum 2026 atana an league match hmasa ber an khel a, Cagliari chu khualmualah 1-0 a hnehin, table chung ber an luah nghal.

AC Milan tan hian Rafael Leao chuan inkhela goal awmchhun a khung a, hun tawp thlenga goal dang a luh tawh loh avangin 1-0 in an chak.

Milan-in hnehna an chan avangin table chung ber luah mah se, nizan khan Inter Milan-in Bologna an mikhual a, Inter hi an chak chuan hmahruaitu an ni leh zui ang.

Hetihlai hian AS Roma erawhin beisei angin inkhel bul an ṭan thei lo a, Inrinni zan khan an mikhualna ramah Atalanta chu 1-0 in an ngam lo.

Atalanta tan Giorgio Scalvini chuan minute 12-naah goal hmahruai a khung a, AS Roma lamin a chhanletna tur an neih loh avangin mikhualna ramah an tlawm - table-ah pangana an ni a, point nga ngawta hmahruaitu Milan phak loin, match khatin an khel tam bawk.

Luciano Spalletti hnuaia insiamṭhat tum Juventus-in an beisei ang result-in kum bul an ṭan thei bik lo - an mikhual Lecce chu 1-1 in an inhnehtawkpui.

Mikhual Lecce hian Lameck Banda hmangin goal hmahruai an khung hial a, minute 49-naah Weston McKennie chuan Juve tan si phurh sutin, hun tawp thleng goal a lut tawh lo.

Juve tan hian forward Jonathan David chuan chakna goal khung theihna remchang nei mah se, penalty a chhuih lut lo a, 1-1 in inkhel a tawp.