Indian Super League - khelh a ni dawn ta!

India rama club football inelna sang ber, Indian Super League chu an khelh dawn leh dawn loh a chian loh reng hnuah, All India Football Federation chuan khelh a nih tur thu an sawi.

AIFF-in a ruat, member pathum awmna Co-ordination Committee chuan ISL club-te an rawn kual hnuah, AIFF hnenah ISL khelh a nih theih dan tura an rawtnate an thlen a, AIFF chuan an pawm.

Co-Ordination Committee hi December 20 khan din niin, member-te hi Kerala Football Association president Navas Meeran, Goa Football Association president Dr. Caitano José Fernandes leh Indian Football Association (West Bengal) honorary secretary Anirban Dutta te an ni a, AIFF deputy secretary general M. Satyanarayan chu ex-officio niin a tel bawk.

AIFF-in a ruat panel-te hian February 15-ah ISL chu khelh ṭan ni se, tiin rawtna an thlen a, AIFF chuan thuchhuah siamin, karleh lamah ISL khelh hun tur hi an puan tur thu an sawi thung.

Buaina lo kiang la

ISL hi ṭum dang ang chu ni se, September thla khan kalpui ṭan tawh tur a ni a, mahse, AIFF leh Football Sports Development Ltd. te thawhhona chu December thlaah khan a tawp avangin ṭum dang angin kalpui zui theih a ni lo.

AIFF-in ISL a kal chhunzawm theih nan commercial partner thar an zawng a, mahse, an hun tiam chhunga AIFF thawhpui duhna theh lut an awm loh avangin ISL buaina tak tak a inṭan.

Hetiang boruak karah hian ISL nghah khawtlai nan Super Cup khelh a ni a, Super Cup khelh chhunga ISL khelh dan tur ruahman fel hman beisei ni mah se, beisei angin thil a la kal chuang lo a, December thla tawpah pawh engmah a chiang lo!

ISL club-a ram pawn player tam zawk an chhuak tawh a, City Football Group pawhin Mumbai City nena an inzawmna an chhu chat a, Indian football tan chânna a tling.

Hello ISL

Kum a thar meuh erawh chuan Indian footballer-ten chanchin lawmawm hriat tur an nei ve ta a, FIFA meuh inrawlh tura an ngen hnuah AIFF-in thuthar an nei a, ISL khelh ngei a ni dawn e.

Hetihrual hian ISL khel tur hian kawng erawh thui tak a la awm. Tun hmaa commercial partner-in league an enkawl ang kha ni tawh loin, AIFF chuan thuneihna pumhlum an nei tawh ang.

Mahse, ISL club-te hian participation fee an chawi a ngai dawn thung a, kum khat atan AIFF hnenah hian vaibelchhe khat an pek a ṭul dawn - an pe duh lo a nih chuan relegate tir an ni dawn!

Hetihlai hian refereeing leh broadcast production fee chu AIFF lam tum tur a ni dawn thung a, commercial partner thar tur an zawng bawk ang.