AFCON: Morocco leh Cameroon ten quarterfinal an lut

AFCON round of 16 chu khelh a ni chho zel a, Pathianni zan inkhelah inelna thlengtu Morocco chuan Tanzania chu 1-0 a hnehin quarterfinal an lut. Inkhel dangah Cameroon-in South Africa 2-1 in an hneh ve bawk.

Prince Moulay Abdellah Stadium-ah Morocco leh Tanzania te an inhmachhawn a, inkhel a nung hle. Tanzania tan Simon Msuva-a'n inkhelh ṭantirah goal ruakah a khung lo a, minute 15-naah Morocco midfielder Ismael Saibari goal khung pawh offside vangin pawm a ni lo.

Morocco tan captain Achraf Hakimi-a'n bul a rawn ṭan thei a, PSG right back hi hliam vangin inelna tir lamah a inlan tam thei lo. Mual dinglamah Hakimi-a'n chance ṭha siam hnem mah se first half-ah goal a lut lo.

Second half-ah pawh Morocco bawk an chungnung a, minute 64-naah captain Hakimi ball pass chu Brahim Diaz chuan Tanzania defender Ibrahim Hamad a bum hnuah goalkeeper Hussein Masalanga leh goal ban inkara awl zim takah goal awmchhun a khung. Real Madrid midfielder Diaz hian goal li a khungna chiah niin,

Inkhel dangah Cameroon chuan South Africa chu 2-1 in an hneh a, Al Medina Stadium-a inkhelah Cameroon tan Junior Tchamadeu leh Christian Kofane ten an khung. Manchester United midfielder Bryan Mbuemo telna team hian 2-0 hma an hruai hnuah South Africa tan Evidence Makgopa-a'n khung ve mah se result a danglam phah lo. Cameroon 2-1 in an chak.

Zanin dar 9:30 hian last 16 inkhel dangah Algeria leh Congo DR an inhmachhawn ang a, zan dar 12:30-ah Ivory Coast leh Burkina Faso te an inkhel bawk ang.