Inter Milan-in hma an hruai chhunzawm
Serie A-ah Inter Milan chuan Pathianni zan khan kum 2026 atana an match hmasa ber an khel a, an mikhual Bologna chu 3-1 in an hneh. AC Milan-in table chung ber luah ve zawk mah se Cristian Chivu hote hian an hmelma Milan chungah awmin table-ah pakhatna an nih chhunzawm.
San Siro-a inkhelah hian ṭan aṭangin Inter an hmuhnawm nghal a, goal khung nghal lawk lo mah se chance hlauhawm an nghah nghal hle. Minute 39-naah Marcus Thuram chuan mawi taka ball a khen hnuah Lautaro Martinez chuan Piotr Zielinski tan a pe leh a, Polish midfielder hian hmahruaina goal a khung.
Inter an hlauhawm chhunzawm a, Argentine forward Lautaro Martinez nung ṭha mah se first half-ah goal a luh belh tawh lo. Second half ṭan a nih hnuah pawh Inter bawkin inkhel an thunun a, minute 48-naah Turkish midfielder Hakan Calhanoglu corner pet chu Lautaro Martinez chuan an hmahruaina belhchhah nan a tauh lut. Argentine forward hi a vanneih zan ni se goal tam zawk khung thei tur a ni.
Goal a luh loh vang vang hnuah minute 74-naah Marcus Thuram chuan corner aṭanga ball lo kal chu Bologna defender-ten an dan ṭhelh hnuah a darin a ti goal. Minute 83-naah Bologna tan Santiago Castro chuan goal khung ve mah se an mualpho tur khuh mawitu mai chauh a nih avang Inter Milan an chak a, table-ah hma hruai chhunzawmin an elpui AC Milan aiin point khatin an sang.
Inkhel dangah Napoli chuan an mikhualna ramah Lazio chu 2-0 in an hneh a, table-ah pathumna nih chhunzawm zelin an hnuai chiaha awm Juventus aiin point liin an sang zawk. Stadio Olimpico-a inkhelah hian mikhual Napoli an chungnung a, mualneitu Lazio-in an ngam lo.
Napoli tan minute 13-na lekah Italian full back Leonardo Spinazzola chuan goal khung nghalin an phur nghal hle. Napoli khel a nung chhunzawm a, minute 32-naah Matteo Politano freekick pet aṭanga ball kal chu Amir Rrahmani chuan tauh lutin a team-te hma a hruai nawnpui.
Minute 81-naah Lazio forward Tijjani Noslin chuan Napoli defender Alessandro Buongiorno chu hlauhawm taka a rah avangin hnawhchhuah a ni. Minute nga hnu lawkah Lazio player Adam Marusic leh Napoli player Pasquale Mazzocchi te chu ball an inchuhna lamah an intihbuai chhunzawm avangin referee-in a hnawt chhuak ve ve a, si phur zawk leh player tlem zawk Lazio tan thawhchhuah ngaihna a awm tawh lo. Goal luh belh tawh loin inkhel a tawp.