Churchill hneh theih kan inring - Standly

Aizawl FC chuan vawiin tlai dar 5:00 hian Fatorda Stadium-ah Churchill Brothers an hmachhawn dawn a, coach Standly Rosario chuan Goan club hi hneh theih an inrin thu a sawi.

Mizo club hian match 11 khelhah point 14 an hmu tawh a, Churchill hian point khatin an hmu tlem zawk. Amaherawhchu Goan club hian match hnihin an khel tlem zawk a, Aizawl FC hian khelh zat inanga Churchill chunga awm tur chuan point thum an hlawhchhuah ngei a ngai dawn a ni.

RG Stadium-ah January 8 khan AFC leh Churchill hi an inkhel tawh a, 2-2 in an inhnehtawk. Aizawl FC hian minute 45-naah Abdoulaye Kanoute hmangin goal an khung hmasa a. Churchill Brothers-in Robert Junior Primus (64') leh Vinil Poojary (78') te goal hmangin an lehthal.

Mizo club-in an mualah tlawm duh loin minute 80-naah Isak Vanlalruatfela hmangin si phurh an sut. Standly Rosario hote phur chhoin Kanoute hmangin chakna goal khungah inngai mah se offside vangin pawm a ni lo. 

Aizawl FC tana goal khungtu Isak Vanlalruatfela chu inhliam vangin a chawlh rih a ṭul a, season tawp lamah a inlan thei chauh dawn. Siphurh sutna goal khungtu Kanoute erawhin match hnuhnung bera Trau an hneh ṭumin goal hnih a khung a, hliam vangin hun tawp lamah lakchhuah ni mah se khel thei tura beisei a ni.

Tlarhnung lama AFC innghahna Juuko Richard Kassaga a la chhawr theih dawn lo a, hrem vanga an intawn hmasak ṭuma inlan lo Joseph Adjei leh C. Lalrosanga te an inlan ang. Mual sir vei lamah Lalthlahlova'n (Patea) dinhmun a rawn sawhnghet chho a, mual dinglamah erawh Joe Zoherliana a awm zel a rinawm.

Aizawl FC-in Goan club ṭum hnih an hmachhawnna turah hian Matias Veron leh Justice Morgan an nei tawh a, Argentine midfielder leh Nigerian forward awm hnu hian Mizo club goal nawr a na ta hle. A tawi zawng chuan I League ṭantirha Aizawl FC squad aiin tun dinhmunah Standly Rosario chhawr theih tur player ṭha a ngah tawh zawk.

Aizawl FC coach Standly Rosario chuan, "Tukin zing (February 14) khan kan thleng chauh a, zin kawng a thui avangin kan chau hle. Amaherawhchu zan khat hahdamna hun kan nei a, ṭha takin kan khel thei ang. Match hnuhnung pahnih kan chak avangin inrintawkna kan ngah a, team boruak pawh a ṭha," tiin Vanglaini a hrilh.

Player chungchang sawiin Standly chuan, "Richard hi match khat hnuah chuan kan chhawr theih ka beisei a, Isak-a erawh season tawp lamah a rawn tel thei chauh ang. Kanoute hi hman theih turah ka ngai a, a la inpeih lo a nih pawhin Justice, Veron leh William te ka nei a, ka lungngai lo. Goa-ah hian point thum hmuh theih ngei ka beisei," tiin a player neiha a lungawi thu a sawi.

Churchill Brothers hian an match hnuhnung berah Chennai City 2-1 in an hneh lo a, chutihrualin hemi hma hian Manipur club Neroca 4-1 in an sawp tih hriat a ṭha.

Goan club hian February 2-a Neroca an hneh aṭang hian Goa an la chhuahsan lo a, an muala khel tur an nih bawk avangin tawh an khirh viau ang. Churchill hian goal nga khung tawh Willis Deon Plaza an nei a, Mizo player pathum Lalkhawpuimawia, Vanlalduatsanga leh Lalengzama Vangchhia te an kawl bawk.